Ka ioh kam ioh jam kadei kawei na ka phang kaba hakhmat eh jong ka jngim briew bad ka lawei jong ki samla ka shong ha ka. Kane ka phang ka long ka bynta ba kongsan ruh ba ka sorkar ka dei ban don khnang ba yn lah ban pynthikna ba yn lah ban thep kam thep jam da ki samla kiba dei ki trai shnong ne ki trai jylla. Ki dang don shibun bah ki kam kiba donkam hapoh ka jylla kiba lah ban mih ha ki lain bapher bapher, hynrei lada kum kine ki jaitkam kin mih kan long kaba eh ban lah ban pynrung da ki trai jylla namar ba bun ki samla kim shym la tip lad tip lynti kumno ban pyntbit ia lade ha kane ka kam. Ki samla kim dei ban shu kut ha kaba pule ia ki degree course bad iakhnieh rungkam ha ki tnad sorkar bapher bapher, hynrei ka jingpule ia ki tnad kiba kyrpang (specialised stream) kan iarap ia ki ban suk ka ioh kam ioh jam.
Ka sorkar ka dei ban shim ia ki lad ki lynti ban iit ia ki kam kiba dang donkam na ka bynta ki tnad bapher bapher kiba ki samla kiba shu pass beit ai ki degree ha kino kino ki stream kin ym lah ban trei ai ki, hynrei tang kito kiba la pyntbit kyrpang ki long kiba bit ban trei. Kum ka nuksa ka kam shipai pynlip ding ne fire man ka dei kaba donkam na ka bynta kawei pa kawei ka tnad office sorkar bad kaba haduh mynta ka sorkar Meghalaya kam pat lah ban don la ki jong ki nongtrei nalor jong ki pulit pynlip ding ka jylla (fire service). Lada ka sorkar kmie ka pynmih ia ka hukum ba dei ban thung kyrkieh ia ki samla ha kane ka kam haman la ki tnad trei kam ka sorkar yn ym don ki samla kiba lah ban aplai lada kim pat dei kiba la pyndep ia ka training kaba biang. Lada ki nongialam ka sorkar ki shim bad iit ia ki lad ki lynti ki dang don hi ki kam ba yn lah ban wanrah jingmyntoi ia ki samla ha kine ki bynta ruh.
I Kong Dr. Helen Giri, i wei na ki longkmie kiba ieit bad shimkhia bha ban pynneh pynsah ia ka rukom tem tynrai bad niewkor ia la ka kolsor, i ong ba lada ka sorkar kan pynmih ia ka hukum ba baroh ki skul bad jaka pule ki dei ban don ia la ki jong ki nonghikai ia ki jingtem jingput tynrai, yn lah ban pyndap ia ka jingdonkam ia mynta hi. Kumta ka long kaba donkam ia ki samla ban shah hikai bad tip ia la ka kolshor bad ban kot shaduh ka kyrdan ban hikai sha ka jaidbynriew khnang ba yn lah ban pynneh pynsah ia ka. Ka long kaba shisha ba donkam ban pynkhlain ia kane ka bynta bad wat ka sorkar ruh ka la buh kyrpang ai ka tnad Arts & Culture na ka bynta kane ka jingthmu, hynrei kat kum ba ka long mynta ka jingieit jong ki samla ia la ka tynrai ka dang duna bha haba ia nujor bad kiwei pat ki jaidbynriew riewliem kane ka thain shatei lam mihngi.
Bun ki samla kim shemphang, kumno ban jied ia ki kam ki jam bad ha kano ka lain ban pyntbit ia lade. Ka jingdon jong ki Career Counselling kan iarap ia ki ba kin sngewthuh shano ban thew bad ki kam kiba kumno kiba kham don lad ban ioh. Kane ka por mynta kam dei shuh kim ki juk rim ba tangba ba dep graduate thungkam la ka thungkam bad hapdeng jong ka kam dang hap ban hikai pat ia ki nongtrei bad iakynduh shibun ki jingeh. Hadien jong ka Career Counselling donkam pat sa ia ki Training Centre ki bapher bapher khamtam lei ha ki kam ba iadei kum ka Hospitality, Office Management & Marketing. Na ka bynta ban trei ha ki kam kum ki Receptionist bad k Front Desk Assistant donkam ia ki samla ba la pyntbit ha ki kam kumno ba kin pyniadei bad ki paidbah kiba wan donkam bad ruh kumno ban pyniadei bad ki nongaikam jong ki bad ruh kumno ban trei ia ka kam kum ki nongtrei ym kum kiba dang shah hikai.
Ka jingdon jong ki Career Counselling kan iarap ruh ia ki samla kumno ban jied ia ki tnad ba kin leit ban pule bad pyntbit ialade khanng ba kin ym don jingeh ban ioh ia ki kam (Placement) haba ki la dep pule. Ha ki snem kiba mynshuwa bun bah ki samla ki jied ban pyntbit ia lade ha ka jingpule ia ka MBA bad la ong ba ka Jylla West Bengal ka la don bun eh ki MBA ha kane ka thain lam mihngi. Ka jingshimkhia jong sorkar ban wanrah ia kane ka phang ban pynshlur ia kito kiba don ka jinglah ban trei ia ki kam ban iasyllok bad ki samla ha kaba iadei bad ki lad ioh kam bad lah shah hikai kan long ka lynti bah ia ki samla. Haduh mynta ki don ki jaka ai jingiasyllok ia ki samla kum ka Don Bosco Technical School bad kiwei pat, hynrei lada ka sorkar kam shim khia bad wanrah ia ka awareness programme kaba khlain kan iarap ia ki samla ban sngewthuh khambha.
