Shillong, Nailar 20: U Myntri ka sorkar jylla uba khmih ïa ka tnat Community & Rural Development (C&RD) u Abu Taher Mondal ha ka sngi baar u la ong ba ka jingthaw ïa ki C&RD block ba thymmai ka dei ka kam kaba bteng.
“Kam dei kata kaba ngi la thaw katto katne ki block ha ka samoi treikam ba la dep bad kumta ym don shuh kiwei pat ki block ki ban dang thaw,” ong u Mondal haba phai nia halor ka jingkylli bad jingdawa ban thaw ïa ka Mawsynram block.
“Ka shong ha ki jingeh jong ki briew kaba ki mad ban leit sha ki administrative unit, bad ban pynsuk ïa ki nongshong shnong, ka jingpynsuk kan don beit, halor kane ka nongrim kane ka kam ka long kaba bteng. Shisien ba ïa ki kam ki jam la pyndep, ha kata ka por ngin sa pynbna bad ka shong ruh baroh ha kano ka rukom kaba ngi treikam shaphang kane,” u la ong.
Haba kylli, u Myntri u la ong, “Ïa ka por ngam lah ban ong lano yn sa pynbna.”
Kumba ka long mynta ka jylla ka don haduh 51 tylli ki C&RD block hadien ba la thaw sa kumba 15 tylli ki block ba thymmai ha kine ki 10 snem ba la leit.
U Myntri kham mynshwa u la pyntip ba ka sorkar ka la pynlut T. 3 klur na ka bynta ki kam tei jingtei haba ïadei bad kine ki block ba la thaw thymmai. U la ong ba dei tang ka building jong ka Samanda bad Betasing block ba la plie.
