Sdang saphriang u khniang jingpang Mpox bthah ka sorkar pdeng ïa ki jylla ban peit pyrman bha

Shillong, Nailar 20 : Ka Tnad ka Koit ka Khiah ka Jylla, ka la peit thuh bha ïa ka jinglong jingman hadien ba ka Health Ministry, ka la bthah ha ka sngi Nyngkong ïa baroh ki Jylla ba kin peitngor bha namar ka jingsaphriang jong u khniang Monkeypoc (Mpox) ha kylleng ki ri ka pyrthei.
Nalor ka Health Ministry, ka World Health Organisation (WHO) ruh kala pynbna ïa ka jingsaphriang u khniang Mpox kum ka jingpang ba hap shimkhia kyrkieh ha satlak ka pyrthei. Une u khniang ba mynta u dei u khniang thymmai bad uba kloi ban ïabit bad ba pynjur ïa ka jingshitom, kaba la pynkhuslai bha ïa ki stad ka koit ka khiah bad ki nongthaw aiñ.
U Heh ka tnad ka Koit ka Khiah ka Jylla ula ong ba ïa mynta hi, ka Tnad ka koit ka khiah kala peit thuh bha ïa ka jinglong jingman. “Ngi la ïoh pdiang ïa ka jingbthah na ka Heath Ministry ka Sorkar Pdeng. Ngi hap ban peit ïa ka jinglong jingman” ula ong.
Ha ka sngi Nyngkong, ka Sorkar Pdeng kala pynmih ïa ka jingbthah sha baroh ki borkhmih ba kin peit pyrman bha ha ki ‘Kad liengsuiñ, ki kad khaïi harud duriaw bad ki jaka khappud” ka Ri Bangladesh bad Pakistan namar ka jingwan jongki nongshong shnong ba kine ki ri ha kum kane ka por ba saphriang u khniang Mpox.
Ka Health Ministry kala bthah ruh ïa ki Jylla ban pynkhreh lypa ïa ki Hospital ba kin lah ban ai jingsumar ïa kiba pang Mpox. Ki Hospital ha Jylla kin long kum ki nodal centre ban ai ïa ki jingtip ba donkam halor ka Mpox. Ka Sorkar Pdeng kala bthah ruh ïa ki Testing Laboratories ba kin long kiba la pynkhreh.
ïa mynta ki don haduh 32 tylli ki testing laboratories kiba lah ban test ïa u khniang Mpox.
Ka jingsaphriang jong u khniang Mpox mynta ka kynti kala sdang ha ki bnai ba sdang jong une u snem bad la antad ba ka jingdon ki briew kiba kit ïa une u khniang thymmai ki don kumba 30,000 ngut. Kiba iap kila kot ruh ïa ka 1000 ngut khamtam eh ha ri Africa.
U khniang Mpox u lah ban saphriang lyngba ka jingpynïadei para met bad u briew ba don khniang, kynthup ïa ka jingktah, doh ieid ne ïaphylliew jingieid lane lyngba ki jaiñ ki nep bad na ki jingshah dait, trot jong ki mrad bad ki briew.
Ki Longkmie ba armet ki lah ruh ban pynïabit ïa u khniang sha ki Khunlung ba dang pun hakpoh. Ki dak jong kane ka jingpang ki kynthup ïa ki kynja khniang ba mih ha ka met nalor ka jingshit met, ka jingktha khlieh, ka jingpang ki ksah bad kiwei kiwei.