Ka jingshim ram shaba palat ka Sorkar Jylla kan lam ïa ka jylla sha lanot: Mukul Sangma

Shillong, Nailur, 09: U nongïalam jong ka Liang Pyrshah u Mukul Sangma u la takraiñ tyngeh ïa ka Sorkar ba la ïalam da ka National Peoples Party (NPP) ba ka jingpynkiew ïa ka jingshim ram ban siew ïa ka trai (principal) bad ïa ka sut (interest) bad maham ruh ba kane kan sa lam ïa ka jylla sha ka “lanot.”
Ha ka jingïakren bad ki lad pathai khubor, u Sangma u la ong ba ka rai jong ka Sorkar ban kyntiew ïa ka jingshim ram kum ka “lama saw.”
“Phi (sorkar) dang shim ram shuh shuh ban pynlut ha kaba siew ïa ka trai bad ka sut. Hangne ka don ka jingsngewkhia bad hangne ka sorkar ka shukor ïa ki paidbah. Nga pynrem ïa kane ka jinglong namar kane kan ïalam ïa ka jylla sha ka lawei kaba sniew kumba la pynpaw da ka lama saw ba la ai da ka CAG. Ka dei ka lama saw,” u la ong.
U la batai ruh ïa kaei kaba la jia shisha ha ka jylla bad ai nuksa da kaba ong, “lada phi la shim ram na Bank, phi don ïa ka EMI bad mynta phim lah ban siew ïa kane ka EMI namar ka jingkamai jong phi kam pat biang. Shu buh lada shim ba phi hap ban siew Rs T. 75,000 hajar bad phi kamai tang T. 50, 000, kumno phin siew ïa kata ka T. 75, 000, kumta phi shim ram biang ban siew ïa kaba la shim ram bad ban siew ïa ka trai bad ïa ka sut?
“Dei na kata ka daw ba ka CAG ka la pynpaw lyngkot ha ka ktien kaba kham suk bad kaba donburom ïa ka jingsngewkhia jong ka katba ka Sorkar kam salia ban buhrieh ïa ka jingshisha bad ban len ïa ka jingshisha. Kane ka long kaba dei ban pynrem namar baroh ngi sngewkhia ïa ka lawei jong ka jylla bad haba kren shaphang ka lawei jong ka jylla, ngi kren shaphang ka jingkhlaiñ jong u saipan. Phin ym khmih lynti ba ki kmie ki kpa jong phi kin shim ram bad kin pynkit ïa ka ram ha ki khun. Kata kam dei kaba ki kmie ki kpa kiba stad ki leh. Kumta ban pynïaid ïa ka Sorkar ka long kumjuh,” la bynrap shuh shuh u Sangma.
Haba pynpaw ba yn ym lah ban kyllum lang ïa kane kum ka ram ha ka dor kaba jem ba la ai da ka Sorkar India, u Myntri Rangbah barim u la ong, “phi lah ban shim ram na ka Sorkar India, kaba la kheiñ kum ka ram h aka dor kaba jem ha kaba ka Sorkar India ka ai ïa phi ki lad da kaba peit ruh ïa ki jingeh jong ka jylla.”