Ngim dei ki dawai ne ki tiar ki tar ba da thoh tarik ban kut ka por: TW Chyne

Shillong, Nailur 09 : U Nongïalam ka Liang Pyrshah ha KHADC, Bah Titos W Chyne u la ong ba u da mong shisha halor ka ka jingmih ka kyntien ‘expired’ ban kynthoh ïa ki MDC tang na ka daw ka jingpynjlan ïa ka elekshon MDC.
Haba kren bad katto katne ngut ki lad pathai khubor, u Bah Titos u la ba katei ka kyntien expired ka la pynmong shisha ïa baroh naba kadei ka kyntien kaba ym sngewtynnad.
“Kane ka kyntien ka la pynmong shisha ïangi namar kum ki briew kiba ngeit ha u Blei ba im wat lada ngi dei ki nongpop. Para briew hi ban ong expired ïa u briew ba dang im kadei ka kyntien kaba la palat liam namar ngim dei ki dawai, ne ki mar ki mata ba buh ha dukan ba la buh da ka por ban kut ne ka expiry date la ka jong. Ka ïap ka im jongngi ki briew kadei ha kti jong u Blei namar dei ma u ba thaw ïa ngi,” bynrap biang u Bah Titos.
Na ka liang utei u heh UDP ba dei ruh u MDC ka Sohra u la ong ba naduh kaba sdang hi, ki la dep ban pynpaw ba ki kwah ban pynlong noh ïa ka elekshon MDC. “Ngi la ïohi ba mih ka jingkynthoh na ki paidbah ba ngi ki MDC ngi kwah bor jubor bad kwah ban pynjlan ïa ka elekshon. Don ruh kiba ong ba ka jingpynjlan kadei namar ka jingtieng ïano re ïano. Hynrei ngi la kren shai naduh ba sdang ba ngi kwah ban pynlong noh ïa ka elekshon,” u la ong.
Shuh shuh u pynshai ba hadien ba la ïaid ka kam, ki ïohi ba hap ban shim bynta bad ai jingmut haduh ban da dep ïa ka kaiphod hapoh 6 bnai ka jingpynjlan ïa ka por.
Haba kren halor ka jingpynjlan biang sa 6 bnai ïa ka samoi treikam jong ka KHADC kaba la kut dang shen, u Bah Titos u la ong ba hadien ba la ïoh ïa ka jingmynjur na u Lat donkam pat ïa ki bor pynïaid elekshon kaba peit da ka sorkar jylla ban pynkhreh na bynta ka elekshon MDC.
“Mynta ka sorkar ka hap ban pynkhreh ïa ka elekshon bad shim ïa ka electoral roll na ka Election Commission ban ïoh ïa ka jingdon ki nongthep vote bad buh la ka jong ïa ki nongthep vote kiba lah ban thep vote ha ka MDC bad don pat ki bym ïoh ban thep vote, kumta kane ka shim por,” u la bynrap biang.
Shuh shuh u ong ba ka kam kaba dang shim por kan dei wat haba ïadei ki kor EVM kumta kane ruh kan shim por 2-3 bnai.
“Nyngkong ngi la ai jingmut ïa ka sorkar ban pynlong noh ïa ka elekshon ha u Naiwieng hynrei ki la pynpaw ba ha utei bnai kadei ka por long eksam kut snem kumta ngi ieh ha ka jingstad jong ka sorkar jylla lano kin pynlong ïa ka elekshon.”
Kumta, u ong ban pyrshah biang ïa ka jingpynjlan elekshon hadien ba ladep tip ïa ka daw ka long biej bad hap ban sngewthuh ïa kata namar kam long satia kaba suk ban leh. U ong pat ba lada ka sorkar ka wan da kawei pat ka lynti ban ong pynwai noh ïa ka samoi na ka liang jong ki, ki pdiang beit namar ka shong ha ka sorkar ban pynwai ne pynjlan biang.
Kumta u ong ba ki kwah ban pynsngewthuh ba kane ka jingpynjlan kam dei satia ba ki leit ban kyrpad ïa ka sorkar ban pynjlan ïa ka elekshon hynrei kadei beit namar hap ban peit ïa ka jingïaid ka kam.