Jowai, Lber 01: Kum shi bynta ban wanrah ïa ka jingïaidbeit ïaid ryntih ka jingñiew vote lashai ka sngi (2/3/2023) ka ban sa pynlong ha ophis jong u Deputy Commissioner ka West Jaiñtia Hills District, bad khnang ban lait na kano kano ka kynrum kynram ka ïaid ka ieng, na ka liang jong u Superintendent of Police ka West Jaiñtia Hills ula pynmih ïa ka rukom pyniaid kali (Traffic arrangement) ha nongbah Jowai na ka bynta lashai ka sngi.
Ki pulit Traffic ka nongbah Jowai kin buh ïa ka No Entry ha lad Thomas Jones ban poi sha D.C. Office. Yn buh No Entry ha Tpep-Pale ban poi sha Iawmusiang. Yn buh No Entry na Mission Compound sha Iawmusiang haduh D.C Office. Yn buh No Entry ha lai lad H.K. Singh shaduh D.C Office. Yn buh No Entry ruh ha jaka pynieng kali Dawki ban poi sha D.C Office.
Baroh ki kali kiba poi na ki thaiñ Riatsiatsim ki dei ban ïaid sha ka liang Mynthong ne sha District Library. Ki kali kiba wan na ki thaiñ Khimmusniang bad Jrisalein ki dei ban ïaid lyngba na ka surok Chutwakhu. Ki kali kiba poi na ki thaiñ New Hill bad Shillong kin hap phai sha ki thaiñ Kynruh Saphlang bad Thomas Jones.
Ym pat shah ban pynlong proseshon ne rally ia ki kyrtong bajop haduh ka 4 tarik
Ha ka jingïadei bad ka sngi ñiew vote ka ban long lashai ka sngi, na ka liang u District Election Officer, West Jaintia Hills ula pynmih katto katne ki kyndon kiba donkam ban bud ryntih da ki kyrtong ne ki seng saiñ hima sima.
Ha kane ka hukum ba la pynmih mynta ka sngi ka la khang ban pynlong ïa ki jingïaid paidbah ne ki rali jong uno uno u kyrtong hadien ba la dep pynbna jop ïa u, bad kane ka hukum kan treikam haduh ka por 4:00 janmiet jong ka 4 tarik mynta u bnai.
La khang ruh ïa ka jingïalum paidbah habar jong ka jaka ñiew vote, katba dang ïaid ka jingñiew ïa ki vote.
Yn ym shah ïa ki paidbah ban ïa kynhoi ne pyrta ha ka jaka ba pynlong ïa ka jingñiew vote, kat bym pat dep ka jingñiew bad ka jingpynbna ïa ka result.
Yn ym shah ïa kino kino ki kyrtong ne ki seng saiñ hima ban pyndonkam ïa ki kor pynsawa, ne lehkmen hajan ka jaka ba pynlong ïa ka jingñiew vote.
Na ka bynta ban ïoh rung shapoh ki jaka ñiew vote, u DEO ula pyntip ba yn shah tang ïa kito kiba don ïa ki ID card. Na ka bynta ki kali pat ban ïoh rung sha ki jaka ba pynlong ïa ka jingñiew vote ki dei ban don ïa ki Car pass bala pynïoh da ka ophis u DEO ka West Jaiñtia Hills.
Ym shah ban rah ïa ki Mobile phone bad ki camera shapoh ki jaka ñiew vote.
La bthah ruh ba baroh ki counting centre kin dei ki No Smoking Zone.
Khliehriat : Ka tnat pulit jong ka East Jaiñtia Hills District, ka buh ka jingpynbna sha baroh ki paidbah, ha kaba ïadei bad ka rukum ïaid ki kali bad ki jaka ban pynieng ïa ki kali ha Khliehriat bad ha ki jaka ba mar jan, na ka bynta ka 2 tarik u lber kaba dei ka sngi ba ñiew ïa ki vote, na ka bynta kane ka Legeslative Assembly Election 2023, ha kaba ïa ka jingñiew vote yn pynlong ha ka ophis u Deputy Commissioner ha Khliehriat.
Katkum ka jingpynbeit na ka tnat pulit, la ong ba ki don san tylli ki bynta jong ka surok ba yn ym shah ban rung ki kali (No Entry Points), yn ym shah ban rung ki kali sha ka surok national highway-6 ba hajan ka ophis u Deputy Commissioner ha Khliehriat, yn ym shah ban rung ki kali na ka surok Khliehriat Presbyterian Higher Secondary School kaba leit sha San Mala, yn shah ban rung kali na ka surok ba don ka ophis ba rim u Deputy Commissioner ka ban poi sha sor bah Khliehriat, ym shah ban rung kali na Khliehriat Community Hall sha surok bah National Highway-6, ym shah ban rung ki kali na ka surok hajan ka SBI ne Lad Block ban poi sha surok bah National Highway.
Ha kaba ïadei bad ki jaka ban pynïeng ïa ki kali, (Parking No 1), la bthah ba baroh ki kali kiba wan na ka liang Rymbai, ki dei ban ïeng ha shi lynter ka surok kaba na Rymbai ter ter shaduh ka ophis ba rim jong u Deputy Commissioner, kito ki kali kiba wan na ka laing Deiñchynrum, ki dei ban phai noh na kwei ka lad na Khliehriat East bad pynieng ïa ki kali ha madan ba don ha Khliehriat East (Parking No2).
Na ka bynta kito ki kali kiba wan na neng, na ka liang Moowakhu, ki dei ban phai noh na Lad Sutnga bad ynda poi ha shi kilo, ki dei ban phai biang bad pynieng ïa ki kali ha kawei ka jaka kaba heh kaba don ha shi kilo (Parking No 3) bad lah ruh ban pynieng ïa ki kali ha madan football Khliehriat West, kaba dei ka Parking No 4.
Ki kali kiba wan na ka liang Sutnga, ki dei ban phai sha Shi Kilo bad buh ïa ki kali ha ka parking No 3 ha shi kilo bad ki lah ruh ban pynieng ïa ki kali ha madan football Khliehriat West, kaba dei ka Parking No 4.
La bthah ruh ba yn ym shah ban pynïeng ïa ki kali ha shilynter ka surok national highway kaba naduh Lad Sutnga haduh Deiñ chynrum.
