Ka jingnoh synñiang ba radbah tam jong ki BSF sha ki nongshong shnong khappud ha EJHD

Khliehriat Lber 19 : Ha ka rukom kaba iphuh iphieng bha, hynnin ka sngi, ka 18 tarik u lber, ka tnat Border Security Force jong ka 172 Batallion, ka la pynlong ïa ka prokram ba kyrpang ha Holy Cross School Umkiang ha kaba bun ki paidbah kiba na ki shnong bapher bapher jong ki thaiñ khappud, ki la ïa poi sha kane ka prokram, ha kane ka prokram ka la don ruh ka jingsam dawai ei sha ki paidbah ba la tip kum ka ‘Mega Mediacal Camp’ kumjuh ruh la sam ïa ki tiar kiba donkam sha ki shnong ki thaw, lah ruh ban ong ba kane ka dei ka jingnoh syniang kaba radbah tam jong ka tnat BSF sha ki shnong khappud.
Ïa kane ka prokram, la wan ban plie paidbah da u Deputy Commissioner ka East Jaiñtia Hills District, u Abhilash Banarwal, IAS bad la ïa don ryngkat lang ruh ki heh shipai BSF ba kynthup u DIG(Med) BSF FTR HQ MEGHALAYA, u Dr. Jalaj Sinha, Commandant 172 BN BSF, u Sanjay Sharma lem bad san ngut kiwei pat ki heh shipai jong ka tnat BSF, ki la don haduh kumba 2000 ngut ki paidbah kiba na ki thaiñ khappud kiba la poi sha kane ka prokram. Ha kane ka sngi, ka 172BN jong ka tnat BSF ka la aiti ïa ki ar tylli ki kali kit nongpang (Ambulance), kawei ka JCV, ka kali pickup, nalor kine ki don ruh sa khathynriew jait ki tiar ba la ai sha ki shnong khappud, kiba kynthup ka Multi Station Gym six station, kaba shong dor T1,65,000 lak tyngka, ka Drumbells 15kilo, drumbell 10 kilo, drumbells 5 kilo, ki Olympic barell rods (7phut),, ki barell weight ba 15 kilo, ba 10 kilo, ba 5 kilo, ki Treadmill Aerofit, ki tiar computer ba kynthup ki PC (Acer Intel Pentiom), ki Printer, ki UPS, ki miej computer, ki shuki, ki Flex Board/ banner bad ki dawai.
Ha kaba ïadei bad ka jingsam dawai ei sha ki paidbah, la wanrah 20 ngut ki doctor na ki jaka sumar bapher bapher , kum na NEIGRIMS, na ki PHC, na ka tnat BSF, na ki tnat AYUSH.
“Kane ka jingnohsyniang ka tnat BSF ka long ka jingkyrkhu ïa ki paidbah ka thaiñ khappud, kane ka kali kit nongpang ruh ka dei kaba lah ban pyndonkam da ki paidbah ka thaiñ, ka jingsam ïa ki kor computer ruh kan ïarap ïa ki shnong ki thaw bad ïa ki skul ba kin kiew shaphrang, kane ka jingïadei jong ki paidbah bad ki shipai BSF ka ïarap ruh ban kyntiew ïa ka roi ka par ha ka thaiñ ha kaba na ka liang ki bor district ruh ngin ïa treilang ban kyntiew ïa ka thaiñ” ong u Deputy Commissioner, Abhilash Banarwal, IAS, u la ai ruh ka jingkhublei kitbok kitrwiang ïa ka tnat BSF bad ai khublei ruh halor kane ka jingtheh jingiarap ka tnat sha ki paidbah ka thaiñ khappud ka ban long ka jingmyntoi ïa ka thaiñ hi baroh kawei.
U Commandant, 172 Battalion BSF, u Sanjay Sharma, u la ong ba ka tnat shipai BSF ka la theh ki jingiarap sha ki paidbah ka thaiñ khappud man ka por, kine ki kali kitnongpang ba la ai mynta ka sngi kin ïarap ïa ki ban pynpoi ïa ki nongpang sha ki jaka ai jingsumar, ki kali picklup kin ïarap ïa ki ha kum kine ki jaka ba sniew ka surok, kumjuh ruh kane ka kali JCV ka long ban pynkhuid lada don kano kano ka jingtwa khyndew kaba kah lynti, namar ki paidbah ha khappud’ ki kynduh jingeh bha ha ka leit ka wan khamtam ha ki aiom slap, namar ka jingtwa khyndew ka ju jia khah khah bad ka buh jingeh ïa ki paidbah ha ka leit ka wan.
Haba kren pat ha kaba ïadei bad ki prokram sam dawai ei sha ki paidbah, u la ong ba ka tnat ka dang don shuh shuh ka jingthmu ba kan sa pynlong shuh shuh ïa kum kine ki prokram sam dawai sha kito ki jaka ba kyndong bha ha ki thaiñ khappud, u la ong ba kin sa don ruh kiwei kiwei ki jait skim na ka tnat CSR jong ka 172 Batallion jong ka BSF kiba yn sa pynbna, ki ban wanrah jingmyntoi ïa ki paidbah nongshong shnong ka thaiñ khappud.
Na ka liang ki paidbah, ki la ai ka jingiaroh bad ai khublei ïa ka tnat BSF bad ki khmih lynti ruh ba ka tnat kan sa nang ïai bteng ban pynlong ïa kum kine ki prokram ki ban long ka jingmyntoi ïa ki paidbah ka thaiñ.
La pynbyrngia ïa ki paidbah da ki jingtem, jingput na ka kynhun ki shipai BSF, ki ba ju tip kum ki BSF-FTR HQ, Meghalaya Band Party.