Nongstoiñ, Lber 19: Wat la jingshah pynïap dusmon jong kawei ka longkmie ka (L) kong Metilda Lyngdoh Marshilong na ka shnong Riangpoit Thymmai ha ka 14 tarik mynta u bnai ka la kynjoh haduh shibnai bad saw ngi. Hynrei, na ka liang ka tnad pulit jong ka West Khasi Hills kam pat lah ban pynthikna la ki la lap ne em ïa kiba donkti ha katei ka kam runar kaba shyrkhei.
Na ka liang ka Kur Lyngdon Marshilong Nongstoiñ area Unit, ha ka sngi saitjaiñ ka 18 tarik Lber ka la pynlong ïa ka dorbar kur ha Nongstoiñ, na ka bynta ban ïapyrkhat bha halor katei ka kam. U bah Sahbor Lyngdoh Marshilong secre-tary jong ka Kur u la ong ba naduh ba katei ka longkmie ka la shah pynïap, ki nongkitkam jong ka kur ki la leit ban ïakynduh ïa ki heh pulit ka District bad ki la kyrpad ïa ki ba kin shimkhia, ha ban thwet ïa kiba don kti ha katei ka kam runar ba shyrkhei bad lada ki la ïoh ban kem ki dei ban pynshitom katba shong ka aiñ.
U la ong ruh ba ki pulit ruh ki la shimkhia bad ki ïoh kem ïa uwei u briew u ba la suba ba u lah ban dei u ba don kti ha katei ka kam. Hynrei, kaba lyngngoh ka long ba haduh mynta ki pulit kim pat lah ban pynthikna la u dei ne em uba don kti ha katei ka kam, namar ha ka jingtohkit jong ki pulit utei u ba la shah kem um shym pat la phla satia ba u don kti.
Utei u nongïalam ka kur u la ong ruh ba ka ka dorbar kur ka sngew lyngngoh bad ka sngewkhia haduh katta katta halor katei ka jingbym pat lah ban pynthikna jong ka tnad pulit la utei u ba shah kem u dei ne em uba don kti ha katei ka kam.
U la ong ruh ba dang ha ka taïew ba la dep, ki dang leit ban ïakynduh ïa ki heh pulit ban wad jingtip la ki dang thwet bad buddien ne em ban lap shuh shuh ïa ki sabut bad ki sakhi star mano ba don kti lang ha katei ka kam. Hynrei na ka liang ki pulit ki la ïathuh ba ka jingtohkit ïa u ba ki la kem kam pat kut haduh mynta, namar ba um pat phla satia la u dei ne em uba don kti ha kaba pynïap ïa katei ka longkmie.
U la ong ba na ka liang ki nongïalam jong ka Kur Lyngdoh Marshilong, kan ym shongthait ban buddien bad ban leit ïakynduh ïa ki heh pulit, ba lada ki dang lap shuh shuh ïa ki sabut ba ki dang don kiwei pat kiba donkti ha katei ka kam runar, ki dei ban pynthikna bad pyntip lem sha ki nongïalam jong ka kur, khnang ba kin tip ïa ka jingshisha.
U la ong ruh ba ka Kur baroh kawei ka sngewkhia ruh namar ba tang hapoh une u snem ar ngut ki mynsiem ba kordor kiba dei ka doh ka snam jong ka kur Lyngdoh Marshilong, ki la ngat ha kaba kum kane ka apot kaba la pynsuhjer bad pynshong syier ïa ki paitbah ha man la ki shnong ki thaw.
Ha kaba ïadei bad kiba kum kine ki jingjia shah thombor jong ki longkmie, ki kynthei khynnah, u la kyntu ba ki bor ka aiñ ba lada ki ïoh ban kem ïa ki briew kiba don kti ha kiba kum kitei ki jait kam, kim dei ban aili ne shah jem, hynrei ki dei ban pynsajia ïa ki haduh ba kiwei pat kin sheptieng ban leh.
U la ong ruh ba na ka liang ka dorbar kur ha kine ki sngi ban wan, kin sa leit jngoh biang ïa ki san ngut ki khunswet kiba katei ka longkmie ka la iehnoh shadien bad ïa ka ïing ka sem jong ki.
