Nongstoiñ, Lber 19: Ka KSU Porkhadoh Area Unit ha jingïalam jong u President samla Westerbose Diengngan lem bad ki dkhot ka KSU Maweit area Unit, ha ka jingïalam jong u samla Caldinus Riangshiang lem bad ki dkhot jong baroh 2 tylli ki unit, ki la leit ban khynra ïa ki bar jylla kiba wan trei hapoh ka Pyndengshahlang-Porkhadoh.
Ha ka jingkhynra la lap kumba 20 ngut ki nongtrei bar jylla bad kim don satia ïa kita ki kot ki sla kiba biang (Labour licence/work permit). Na ka liang ka seng khlem da bun ktien ka la phah leit phai noh shisyndon ïa ki.
“Na ka liang jong ka seng ka phah ka kyrwoh jingmaham kaba tyngeh ïa ki briew kiba pyrshang ban wanrah nongtrei bar jylla da ki bym don ki kot ki sla kiba biang. Na ka liang jong ka seng ngin ym shah da lei lei ruh ïa kiba kin wan trei, namar kan ktah ïa ka shongsuk shongsaiñ jong ka dong ka thaiñ bad ka jylla hi baroh kawei”.
“Kumba ngi la ïohi bad sakhi na ka por sha ka por bad ka dei ruh ka jingpynkheiñ ïa ka aiñ ‘Inter-state migrants workmen (Regulations of employment and conditions of service) act 2011 jong ka Meghalaya”, ong u samla Westerbose Diengngan.
“Hadien ka jingmaham ka jong ka seng bad lada ki riew shimet lane ki contractor ki leh donbor ban ïai wanrah shuh shuh ïa ki bar jylla (migrants worker) ki bym don ïa ki kot ki sla kiba biang, na ka liang jong ka seng ruh kin sa shim da kawei pat ka lynti”.
“Ka Seng da kaba burom ka buh ka jingkyrpad ïa ki sordar bad ki nongkitkam jong ki shnong, ba kim dei ban shah ïa ki bar jylla ban wan trei khlem ki kot ki sla kiba biang bad ruh ban nyn ailad ïa ki ba kin nym rung kin mih katba mon ha kane ka dong ka thaiñ hi baroh kawei”.
“Ka seng ka buh ruh ka jingkyrpad ïa ki nongsyn-shar shnong ba kin ai ka jingïatreilang bad ka seng, khnang ban wanrah ïa ka shongsuk shongsaiñ hapoh ka dong ka thaiñ hi baroh kawei”, u la ong.
