Ka jinglaitluid ka Ri India: Ki Kynthei Khasi ha ka jylli Saiñdur ïa ka synshar khadar

Baroh shi katta ngi rakhe bad kynmaw burom tang ïa u Tirot Sing bad u Kiang Nangbah kum ki nongïalam. Hoid kine ki dei ki riewïakhun kiba la ïeng pyrshah ïa ka Sorkar Bilat ha kine ki lum. Ka long ruh kaba sngewdiaw ba ngi kynmaw bad rakhe tang ïa ki ar tylli ki jingïakhun pyrshah ïa ka Sorkar Bilat, kata ka Thma Nongkhlaw ha ka snem 1829-1830 bad ka Thma Synteng jong ka snem 1861-1862, katba ngi klet pat ïa kiwei de ki jingïakhun pyrshah ïa ka Sorkar Bilat lane kiwei pat ki jingïakren-ïatai kiba la saiñdur ïa ka synshar-khadar hapoh ka bri Hynñiewtrep naduh ki por shuwa ka jinglaitluid ka Ri India.
Ngim ju ïakren koit halor ka jingnoh synñiang ki kynthei Khasi ha ka jingïakhun ban ïoh jinglaitluid lymne ïa ka jingïashim bynta jong ki ban saiñdur ïa ka synshar-bishar naduh shuwa ka jinglaitluid. Ngi leh klet bad ngim ñiewkor ei ei ïa ki namar la pynsngewthuh bakla ba ki dei tang ki kynthei shibor kiba duna, ki bym larkam bad kumta kim lah ban tei ïa ka synshar ha ka it ka hima. Phewse, kam long kumta bad lah ban khylliap nia ba kaei kaba ki ong shaphang ki kynthei ka long kaba bakla. Katto katne bnai shuwa ka 15 August 1947 katba ka jingïatai nia halor ka lawei jong ka Ri Hynñiewtrep ka dang khih phaloh bad jur bha, shi kynhun ki kynthei Khasi ki la leit ban ïakynduh ïa u Governor ka Assam ban pynsngew bad pyni ïa ka saiïdur jong synshar-khadar ha ka Ri Hynñiewtrep.
Ha kane ka juk kaba ñiewpoh bad pyndonkam ïa ka met jong ka kynthei na ka bynta ka thma niam, thma jaitbynriew, thma politik bad ha ka imlang sahlang Hynñiewtrep kaba dang don hi ka jingkhanglad ïa ki kynthei ban ïashim bynta ha ki kam shnong ne synshar shnong ne Raij ne Hima. Ka long kaba kongsan, namarkatta, ban pynkhie im thymmai ïa ka bor, ka sap bad ka snap jong ki kynthei ban tei bad saiñdur ïa ka synshar-khadar, ka imlang sahlang kaba la ju don naduh ki por kulong kumah. Ha kane ka dur ngi lah ruh ban pynkut noh shi syndon ïa ka kolshor kaba ñiew beiñ bad leh thombor ïa ki kynthei.
Ym lah ban len ba ka histori shaphang ka jinglaitluid ka Ri India ka kynthup ruh ïa ki khana bad ki jingjia kiba ïathuh ïa ngi shaphang ki spah bad ki hajar ngut ki riewshlur kynthei kiba don ha ki thaiñ bapher kiba len lade bad aiti ïa la ka jingim. Kane ka kynthup ruh ïa ki kynthei Khasi bad ha kane ka jingrakhe jinglaitluid kaba 76, la sngew dei ban sot ïa ki katto katne ki mat na ka dorkhas (memorandum) kaba ki kynthei Khasi ki la thoh bad leit ai ha u Governor jong ka Assam ha ka 24 June 1947. Kane ka dorkhas ka dawa ba ki Hima Khasi ki dei ban ïoh biang ïa ka kyrdan Hima bad ki khun ki hajar jong ki Hima kin synshar hi da lade ïa lade. Nangta shuh shuh, ka paw ruh ha kane ka dorkhas ba ki kynthei Khasi ki ïeng pyrshah ïa ka rukom synshar donbor da ki heh paid.
ïa kane ka dorkhas la thoh ha shuwa ba ki Hima Khasi kin soi ïa ka soskular, ka Instrument of Accession, bad ha shuwa ka jingïalang jong ka Khasi States Constitution Making Dorbar ha ka snem 1949. Kane ka dei ban ktik ïa ki samla pule ba kin nang tih bniah halor kine ki jingjia bad khamtam halor ka jingnoh synñiang ki kynthei.
Kane harum ka dei kaba la sot na ka dorkhas bad la pynkylla sha ka khasi:
“Ha,
U Lat Sahep Sir M.S Akbar Hydari, KCSI, ICS, Governor of Assam,
Lat Sahep ba don burom,
Ngi ki kynthei jong ka Khasi bad Jaiñtia Hills ngi don ka bynta kaba khraw bad kyrpang ha kine ki lum namar ki riti ki dustur kiba don halor ka kheiñ jait kheiñ khong bad ka ïoh pateng…ki kynthei Khasi bad Jaiñtia ki long kiba tbit ha ki kam ki jam bad ha ka khaïi-pateng haba ïanujor bad kiwei ki kynthei kiba im ha ri thor. Ki kynthei khasi kiba la nang thoh nang pule bad kiba shong skul ki long kiba bun tam napdeng ki jaitbynriew. Ka riti dustur, ka ïoh pateng bad kiwei ka pynlong ïa ki kynthei khasi kiba khlaiñ bad kumta ki don ka sur bad ka bor ban ïashim bynta ha kino kino ki kam kiba ktah ïa ka lawei jong ka jaidbynriew.
…Naduh hyndai kulong kumah…ki khasi ki la don la ka jong ka rukom synshar paidbah. Ki paidbah ne ki dkhot jong ki kur bapher ki don ïa ki hok bad ka bor ban ïashim bynta lang ha ki kam baroh. Ka khyndew ka shyiap ka dei jong ki paidbah bad kumta ym ju don ka jinglum khajana na ka khyndew. Ki paidbah ki jied ïa u Syiem bad ki lah ban pynkhyllem na ka jinglong Syiem lada shem ba u Syiem u synshar mutlop. U Syiem u don ka kynhun jong ki Myntri kiba ai buit bad ai jingmut ïa U ha ka jingsynshar ïa ka it ka hima. ïa kine ki Myntri la jied da ki paidbah bad ki Myntri ruh ki lah ban shah weng na ka kam da ka sur jong ki paidbah. Nalor kine, ka don ka Dorbar Hima kaba dei ka Dorbar Paidbah kaba ha khlieh duh bad kaba lah ban shim kino kino ki rai kiba ïadei bad ka synshar khadar ha ka Hima.
…watla ka kolshor ki nong Bilat ka la suh thied ha kine ki lum, pynban ki trai ri ki la ïakhun tyngeh ban pynneh ïa la ka tynrai bad ban im bad synshar laitluid katkum ka synshar paidbah ba la saiñdur da ki longshuwa…Lah ban kdew ba watla ka Sorkar Bilat ka don bynta ha ka jingpynïaid Hima, hynrei kam ju tuklar pat ïa ki bynta kiba ïasnoh bad ka dei riti bad ka synshar paidbah lyngba ki Syiem bad ki Dorbar Hima.
Da kaba ithuh ïa ka hok jong ki paidbah ban synshar hi da lade ïa lade, la phiah ïa ka Ri India ha ki Jylla ba pher. Ki Hima Khasi kiba la ïasoh bad ka Sorkar Bilat lyngba ki soskular ki dei ban ïoh ïa kajuh ka hok ban synshar hi. Ki Khasi wat la ki long kiba rit paid, hynrei ki don la ki jong ki riti ki dustur bad ki shah synshar ha ka Sorkar Bilat lyngba ki Soskular ba ki ïasoi bad kumta ka dei ka hok jong ki ban ïoh biang ïa ka jinglaitluid bad ban synshar hi da lade ïa lade.
…Ngi don ka daw ban artatien ba ngin ym lah ban ïoh ïa ki hok tynrai jong ngi lada don ka jingpyrshang ban pynduh pyndam noh ïa ki rukom synshar Syiem bad ki Dorbar Hima bad ban thaw bujli noh da kiwei. Ki rukom synshar ba thymmai ki lah ban long kiba bha, hynrei ka long kaba ma ba kin khynñiat ïa kine ki lum shapoh ka pung jong ka Hindustan lane Pakistan bad kan long kumba khynñiat ïa ngi sha ka jingïap.
Dei ban sngewthuh…ba ngi ïapher bak ly bak na kiwei ha ka ktien ka thylliej, ka niam, ka rukom im bad ki riti dustur, naduh ki rukom bam bad kiwei. Kane ka jaitbynriew jong ngi kaba rit paid ka lah ban duh jait lada pynngat ïa ka ha ka riti synshar jong ki heh paid Hindu lane Muslim. Wat la ngi long kiba rit paid, ngim ïohi pat ban don kano kano ka daw ka ban khanglad ïa ngi ba ngin ïai bteng ban im katkum ki riti ki dustur bad ka synshar khadar tynrai.
…Ngi tip biang biang ba ngim lah ban im marwei lada ngi ïoh ïa ka jinglaitluid bad ngi sngewthuh bha ruh ïa kata ba kumba ngi long mynta ngi hap ban shaniah ha kiwei pat kiba na bar na ka bynta kiba bun ki jingdonkam jong ngi. Ka jinglaitluid kam mut ba ngi la biang lut na lade. Hynrei da ka jingïakren bad lyngba ki soskular…ngi lah ban ïatreilang bad ki Ri ba marjan ha ki katto katne ki mat kum ha ki kam ïada ri (defence), ka leit ka wan (communications) bad ka pisa tyngka (currency).
Hoid ngi sngewthuh ruh…ba ngi dei ban don ki lad pynmih tyngka kiba khlaiñ na ka bynta ban pynïaid ïa kiba bun ki kam bad jingsynshar. Ngi ngeit ba ka don ka lad bad ka lah ban long ba ngin kyrshan hi da lade na ki jingmih kiba don ha kine ki lum bad kham hadien ynda la lah ban thaw ïa ki lad pynmih katkum ka juk stad saïan, ngin sa lah ban pynmih khambun bad ka Ri kan lait na ka jingkit ram. Ngi kular ba ngin ym pynbor ne thlia ïano ïano ruh haba ngin pynïaid ïa ki kam ki jam bad jingsynshar.
…Ngi don ka hok ban jied ïa ka rukom im kaba ngi kwah…ka jingsynshar jong ka Sorkar Bilat kan kut noh shen bad kumta ki Hima Khasi baroh, la kiba rit ne ba heh, kiba la synrop lang mynta hapoh ka Federation of Khasi States ki dei ban ïoh ïa ka hok ban rai ïa ka lawei jong ka synshar khadar. ïa kiwei de ki jaka kiba hap hapoh ka Sorkar Bilat (British area) dei ban pynphai biang ïa ki sha ki Hima…
Ha kaba ïadei bad ka Jaiñtia Hills, ka dei ka hok jong ngi ban dawa ba dei ban ai biang ïa ka kyrdan Hima khnang ba kan lah ban ïasoh lang bad ka Federation of Khasi States. Ngi kyrmen, ba ma phi u Lat Sahep phin bishar hok bad kan long ka jingleh thombor kaba shyrkhei tam bad kaba ym lah ban pdiang lada phiah ïa ngi ki Khasi ha ki ar kynhun ne ha ki ar liang.
Ki nongthoh… Sd. Mavis Dunn Jaid Lyngdoh, Sd. K. Kharsati, Sd. R. Soanes, Sd. Shim Kiri Jaid Syiem of Khyrim, Sd. (Mrs) B.Diengdoh-Taylor, Sd. Clayrina Diengdoh, Sd. Gladys D. Diengdoh of Cherra, Sd. Prillnorine Chyne of Shella State, Sd. S.M Ropmay, Sd. Klesina Rynjah, Sd. Emralda Rynjah, Sd. Dr. Estherly Laloo of Jaiñtia Hills, Sd.Miss R.Blah, Sd. Miss Sabina Nongrum’, Sd. Miss Rufina Nongrum, Sd. Dr. (Mrs) D.Jyrwa, Jaiñtia, Sd. Wessily Rani, Sd. (Mrs) H.M Ladia, Jaiñtia, Sd. Miss I.Lyngdoh, Sd. Miss G.Roy (Cherra), Sd. Tropsibon Rynjah, Sd.Nisibon, Sd. Deltibon, Sd. Sharamon Shabong (Laitkyngkot), Sd. Jointisibon Rynjah, Sd. Winola Sumer, Sd. T. Emcynora, Sd. Kathleen Lyngdoh, Sd. Nurse R.S Synrem, Laittyr-ah, Sd. Nurse Sesibon Nongthathian, Laitkynsew, Sd. Nurse S. Willa, Jaiñtia, Sd. Nurse D.L Lyngdoh, Jaiñtia, Sd. Nurse S.B Sohtun, Mawphu, Sd. Nurse Erily, Mawlai, Sd. Nurse D.Basaiawmoid, Sd. Nurse Shat, Tynrong, Sd. Nurse Carvie, Cherrapunjee, Sd. Sister Sidia, Cherrapunjee, Sd. Noramai, Mawlai, Sd. Glosimon of Nongkhlaw State, Sd. Ka Bliantimai jaid Syiem of Mylliem, Sd. Enid Blah, Sd. Q. Pariat, Sd. Dr. S.M Ropmay, Sd. H.Rynjah bad kiwei kiwei.
Dated Shillong; The 24 June 1947.
(Tyllong jingtip- SRCC)