Shillong, Nailar 13 : Ka General Council jongka United Democratic Party (UDP) kaba la long ha ka Sngi Saitjain ka la ïathir sani bha halor ka jingpynkhlaiñ ïa kane ka seng saiñ pyrthei ha ka jylla bad khamtam eh shwa ban leit sha ka Election MP bad MDC ka ban long ha u snem ban wan.
Haba kren sha ki lad pthai khubor u President jongka UDP u bah Metbah Lyngdoh uba la shah jied pynskhem biang kum u President ka party u la ong ba ka Party hi nangne shakhmat kan pynkhreh noh ïaka election MP ba MDC.
Kumba long mynta ki party ba heh ha ka jylla ki la nang pynkhreh ïa kine ki election naduh ka NPP, BJP, VPP bad mynta sa ka UDP ruh katba ka Congress pat ka dang sngap jar ym tip la kan pynïakhun ïa une u MP ba mynta u ma Vincent H Pala ne kan pynïakhun noh da uwei u kyrtong.
Na ka liang ka NPP la sawa ka sur ba ka lah ban pynïakhun da u MLA ba rim ka Mawsynram u bah Himalaya Shangpliang.
Ka UDP ruh kumba long mynta ka don hi ki kyrtong kiba thmu ban ïa aireng kata kum u bah Jemino Mawthoh, bah Titus Chyne, bah P.T Sawkmie bad wat ka kyrteng u bah Paul Lyngdoh ruh ka sawa wat la u don mynta ha ka kynhun myntri ruh.
