Ka jingkhot iakren ka sorkar ka dei tang ka buit ban pyntroiñ ïa ka Seng ong ka HNLC

Shillong, Naiwieng 15: Ka seng Lehnoh kaba la shah kheiñ beaiñ ka Hynñiewtrep National Liberation Council (HNLC) ka la kynnoh ba ka jingthmu jong ka sorkar ban khot ïakren ïasuk kadei ka jingthmu ban pyntroiñ ïa ka seng.
“Ka jingkhot jong u ban wan sha ka jingïakren ïasuk kam dei kaei kaei hynrei kadei ka dak jong jingbha jingmiat jong ka sorkar ym dei na ka bynta ka jingbha jong ka ri. Ka jingthmu ba shisha shalyndet ka dei ka jingthmu ban pyntroiñ, ban pyntlot, bad ban pynïaid ïa ngi ban pyntlot ruh ïa ka jingthmu jong ngi bad ban pynkut ïa ka daw da kaba leh mynleh ban wad ïa ka jingsuk. Kane ka long ruh kum ka dak ban khñiot ïa ka jingïakhih jong ngi,” ong u General secretary cum publicity secretary ka HNLC u Bah Saiñkupar Nongtraw ha ka kyrwoh khubor ha ka sngi Thohdieng.
Kane ka jingkren ka la long ruh tang shisngi ba ka sorkar ka la pynjlan biang ïa ka jingkheiñ beaiñ sa kumba 5 snem ïa ka HNLC.
Na ka liang u Bah Nongtraw u la ong ba ka seng kam sngewphylla ïa ka rai jong ka sorkar ba kan pynjlan biang ïa ka jingkheiñ beaiñ ïa ka HNLC bad ban pynngat hapoh ka Unlawful Activities (Prevention) Act, 1967.
“Kane ka jingleh ka pynphalang ïa ka jingkhñiot ïa ka jingthmu jong ngi halor ka saiñ hima sima bad ban khñiot ruh ïa ka jingïakhun jong ngi ban shim ka rai dalade,” u la bynrap.
Shuh shuh u nongïalam ka HNLC u la ong, “Ka jingpynphriang ïa ka khubor da ka tnat Kam Pohïing ïa ka HNLC kum ka “spent force” da kaba don satang 10-15 ngut ki dkhot ka pyni ïa ka jingkheiñ bym suitñiew ïa ka bor bad ka jingbun paid jong ngi. Hynrei kane ka jingkheiñ ka pyni ba ka dei ka jingïalam bakla ha kaba ki la don haduh 73 ngut ki dkhot ka HNLC kiba la shah kem haduh kine ki sngi bad ka jingbteng pat ban ïai kiew ka jingdon ki dkhot.”
“Shuh shuh ka jingshisha ka long ba tang 3 ngut ki dkhot kiba la wan pyndem wait ha kine ki 5 snem ba la leit ka pyni ïa ka jingïai khlaiñ bad ka jingaiti ïa ka daw jong ka. Kane ka dei ruh ka jingkiew ha ka jingkut jingmut jingpyrkhat hapdeng ki samla kiba ju ïai ithuh ïa ki jingïaleh kiba da ki tiar bad ka jingshah thombor hapoh ki rukom pynïaid kam ka ri India,” u la ong.
Shuh shuh u Bah Nongtraw u la ong, “Ba haduh kine ki sngi, ka sorkar India kam pat kylla ïa ki kam bad ki lynti kiba tlot jong ka. Kadei ka sorkar India kaba ïakhun da ka thma pyrshah ïa ka ri jong ngi lyngba ki buit shalak.”
“Hynrei haba ngi ïeng ban ïada ïa la ka Hynñiewtrep baieid jong ngi, ngi la shah kynnoh ba ngi la ïaleh thma pyrshah ïa ka Ri India watla ka dei ma ka kaba la sdang ïa kane ka thma. Ka jingdon ka khana bad ka lynti jong ka ri jong ngi ha ryngkat bad ki jingmynjur kiba rim, ka pyni ïa ka jingdonkam ban ïoh ka jingithuh ïa ka jinglaitluid bad ka jingdonkam ban synshar hi dalade,” u la ong da kaba bynrap, “Ngi ïakhun ïa ka sorkar jong phi ban pynlaitluid ïa ka Hynñiewtrep na ki jingshah thombor ha ka bor met, ka bor pyrkhat bad ka jingshah teh mraw. Phi don ka kam hadien ba ka Kashmir ka don la ka jong ka lama bad ka riti synshar, bad phim kwah ba ki paid Naga ban don la ki jong. Lada ka jinglaitluid kam dei ka rai balei phi pyrshah ïa ka jingsynshar na la ïing? Balei phi pyrshah ïa ka jingmut ban synshar ïalade?.”
Haba ong ba ka jingïaibteng ban pynduh ïa ka hok jong ki hima ban ïoh synshar ïalade ka long pyrshah ïa ki jingmut jong ka kam synshar paidbah bad ka hok ba ka sorkar India ka kam ban pynneh, u Bah Nongtraw u la ong, “Ha u Nailar 1947, ka Federation of Khasi States ka la rung hapoh ka jingïateh ne ka provisional treaty, kaba la khot da ka “Standstill Agreement,” bad ka sorkar jong phi. Kane ka jingïateh ka khang ïa u pud u sam jong ka ri Hynñiewtrep na ka kam ban ïada, ki kam bar ri bad ki lad ki lynti.”
“Ka jingpynrung ïa kane ka jingmynjur da ka sorkar jong phi ka la pynhiar dor ïa ka jingïadei jong ngi kaba la dep ban thaw. Lada ka la don ka jingburom ïa kane ka jingïamynjur ka Hynñiewtrep kan hap bteng hapoh ki pud jong ka kam saiñ pyrthei jong ka jong phi, ban don hapoh ka jingïada jong ka sorkar jong phi ban ïada kaba nang pynjur ka jingkyntur pud hapoh ka jinglait luid ka jong ngi bad ban rai hi ïalade,” u la ong.
“Hadien 77 tylli ki snem naduh ba la ïoh ïa ka jinglaitluid, ka sorkar jong phi ka la pulom ban burom bad ban pyntreikam ïa ki kyndon ka Instrument of Accession kaba ha u Nohprah 1947- kane ka jingmynjur ka pynbor ïa ki Syiem bad ki Hima hapoh ka jingshahteh bad shah pynbor. Ka jingpynkheiñ ïa kane ka jingmynjur bad ki jingleh jong phi ka la nang pynlong ha ngi ïa ka mynsiem aiti ban wad ïa ka hok, ban pynneh ïa ki hok jong ki briew jong nga, bad ban ïohkam biang ïa ka jinglong laitluid jong ka ri Hynñiewtrep,” u la bynrap shuh shuh.