Ka jingkhang syndet ka sorkar ïa ka MCCL ka la ktah bha ïa ki nong Sohra, ong u kyrtong VPP

Shillong Rymphang 02: U Kyrtong ka Voice of the people’s Party (VPP) na Sohra Constituency u Bah John Wilson Thabah u la ong ba ka jingkhang syndet jong ka Sorkar jylla ïa ka MCCL ha Mawmluh ka la ktah shibun bha ïa ka ïoh ka kot, ka kamai kajih jong ki kup shilliang sem shilliang jong ki paidbah nongshong shnong jong ka thaiñ Sohra bad khamtam eh ïa kito ki nongtrei jong kane ka karkhana pynmih dewbilat bad kymjuh ruh ïa kito kiba buh dukan bad kiba bylla.
Ïa kane u la kren bad u Mawphor hadien ba u la dep ban thep kyrteng kum u kyrtong ka VPP ban ïakhun ïa ka elekshon MDC sha ka KHADC ka ban long ha ka 21 tarik mynta u bnai. Hadien ba la dep ban thep kyrteng hapoh ka ophis Sub Divisional Officer ha Sohra une u kyrtong, u la kular ruh ba lada ki paidbah ki jied ïa u ha kane ka kynti un shakri hok katba lah la ka bor jong u bad ban ym thew shilliang ïano ïano ruh.
Namar ka jingkhim jong ka por u Bah Thabah u la kyrpad ïa kito ki paidbah ban kyrshan tylli ïa u na ka bynta ka jingdonkam ban wanrah ki jingkylla.
Haba kren bad u nongthoh khubor hadien ba la dep thep kyrteng ïalade hapoh SDO ophis ka Sohra ban ïakhun ïa ka elekshon MDC na Sohra u Bah John u la ong, “Ka jingkhang syndet ïa ka MCCL ka la ktah jur shisha shisha ïa kiba bun ki longïing ha kane ka thaiñ Sohra jong ngi la ka long directly ne indirectly, haba phai mynta sha ka kamai kajih, ka trei ka ktah, ka ïew Sohra, kumta ter ter, ka jingtyllun ka pisa ka la duna shaba palat, bun ki briew kiba die jingdie, kiba khaïi pateng ki la shem jingeh kaba khraw bha, kumjuh ki briew kiba ju supply ïa u dewïong bad ïa ki tiar kiba donkam hapoh ka MCCL mynta ki la shem jingeh bha namar ka kam kaba ki trei ki ktah kam long shuh kumba kadei ban long kumta ngi ïohi shisha ba kane ka jingkhang syndet ïa ka MCCL ne ka karkhana pynmih dewbilat ka la ktah bha,” ong u Bah Thabah.
“Na ka liang jong nga lada ki paidbah ki ibit ban jied kum u MDC ngan pyrshang ban ïakren bad ki bor Sorkar na ka bynta ban pynmih biang ïa ka ïoh ka kot ha ka thaiñ Sohra, la ka long ban thaw ki lad ki lynti ha kano kano ka dur ba ki paidbah ki kwah ban pynïoh biang ïa ka ïoh ka kot kumba ju long ha ki por mynshwa,” u la ong.
Ha kaba ïadei pat bad ka seng VPP hapoh Sohra Constituency u Bah Thabah u la ong, “Ha kaba ïadei bad ka seng VPP ha kane ka thaiñ Sohra, ka jingkyrshan ki paidbah ka long kaba sngewhun naba kat shaba nga ïaid sha ki shnong ki thaw nga ïohi ba ki paidbah ki angnud ïa ki jingkylla shisha naduh ki longkmie longkpa bad kumta ter ter, ki kwah ïa ka jingkylla bad ha kine ki snem ba la leit noh kam idon satia ka jingshakri kaba i hun ne sngewhun satia ïa ki paidbah ka constituency kaba ki la ïoh na ki nongmihkhmat jong ki, kumta nga kyrpad da ka mynsiem kaba sngewrit bad da ka jingieid ban ïatreilang ha kane ka jingpyrshang jong nga ban wanrah ïa ka jingangnud jong ki ia ka jingkylla bad ba kin thep ïa ka vote jong ki ha ka shap jong u Prah bad nga kyrmen ba ki jingkyrshan ba ki ai kin ym babe satia namar ngin ïaid beit thik katkum ka nongrim ba la hikai da ka VPP ban ai ka jingshakri ïa ki paidbah kaba khuid khlem noh shilliang ïa u paidbah,” u la ong.