Sorkar shimkhia mardor ne ngin leh da kaba tyngeh, byrngem ki paidbah

Baroh shimiet khlem shongthait pynmih tdem ki karkhana ha Byrnihat haduh mynstep

0

Nongpoh, Rymphang, 02: Ki nongshong shnong ba sah marjan bad ki karkhana ha ka thaiñ Byrnihat mynta ka miet ki la ud la nam, hadien ka jingsma kaba shyrkhei bad ka tdem ba mih na ki karkhana ha katei ka thaiñ kiba trei shimiet shimiet khlem shongthaid, bad i kumba kitei ki karkhana kim patiaw eiei ïa ka jingeh ba mad da ki paidbah ba shong ba sah ha katei ka thaiñ.
Hadien ba u nongthoh khubor jong u Mawphor dang ha kine ki khyndiat sngi u la hiar sha katei ka jaka ban sakhi bad pynpaw pyrthei ïa ka jingeh kaba mad da ki paidbah, na ka liang ki nongshong shong mynta ka miet ki la pyntip ryngkat ki dur ba kitei ki karkhana kim shongthaid ban pynmih tdem ryngkat ka jingsma kaba shyrkhei ba kim lah wat ban ring mynsiem haduh ka por mynstep.
“Kane kam dei shuh ka kam kai kam thamula ban shu peitkai ne sngap man man ïa ka jingeh ki paidbah hynrei ka sorkar ka dei ban shimkhia mardor bad leh da kaba tyngeh pyrshah ïa kitei ki karkhana kiba pynkheiñ ïa ki kyndon ban pynmih ïa ka tdem jaboh kaba ktah ïa ki paidbah katei ka thaiñ, namar ka jingshitom bad ka jingïap ka la ap lypa ïa ki paidbah lada kan ïai long sah kumne” la ong uwei na ki nongshong shnong haba kren bad u nongthoh khubor bad pynpaw ruh ba um kwah shuh ban sah ha katei ka jaka namar ka jingsheptieng ïa ki khun kiba dang rit, bad kadei ka jingïaleh kaba khraw namar ki don ruh ki tymmen kiba la thiah pang ha jingthiah.
La ong ruh kaba pyntharai sniew ïa ki paidbah ka long ba tang shu wan ki briew jong ka tnad MSPCB kitei ki karkhana ki la sangeh noh ban pynmih tdem bad ym don sakhi satia ban pynshisha ha ka por ba don ki briew jong ka tnad Pollution, lait noh tang ki video ba la ïoh ring da ki paidbah ha ka por ba jur ka jingpynmih tdem.
Halor katei ka jingeh kaba ki paidbah ki mad na ka jingsma kaba mih bad kumjuh ka tdem jaboh bad pum pum ba ki hap ban bam bad ring mynsiem man ka sngi na ka liang ki paidbah ki la byrngem da kaba tyngeh ba ka sorkar ka dei ban shimkhia mardor ban pyrkhing bad ban leh eiei, lym kumta kim banse ban shim pat da kiwei ki lad ki lynti kiba tyngeh wat ban leit tur bad khang tala ïa kitei ki karkhana.

Leave A Reply

Your email address will not be published.