K a Seng BJP ka la jop ïa ka elekshon ha ki lai tylli ki jylla jong ka ri India bad kine ki lai tylli ki jylla ruh kidei ki jylla ba paw jong ka ri India ba la ju tip kum kita ki Hindi Heartland ne ki jylla kiba ki paidbah ki kren beit da ka Hindi. Kine ki jylla ki long ka Madhya Pradesh, kawei na ki jylla ba heh jong ka ri India. Nangta ka Rajasthan bad ka Chhatisgarh. Katba ka Congress pat ka jop tang ha Telangana, da kaba knieh noh ïa ka bor synshar na ka Seng Bharat Rashtra Samithi, ba la ïalam da u K. Chandrasekhar Rao, kaba la synshar ïa kane ka jylla naduh u snem 2014, hadien ba kane ka jylla ka la ïoh laka jong ka jylla da kaba ïakhlad noh ba ka Andhra Pradesh. Ha Mizoram, kaba ka Congress ka la ju synshar teng, ka la jop tang 1 seat ha ka ïingdorbar kaba don 40 ngut ki dkhot.
Ha kaba ïadei bad kane ka result ne ka jingjop ka BJP, ka Madhya Pradesh ha u snem 2018 la jop da ka Congress da kaba tam salit ïa ka BJP ha ka jingïoh majority. Hynrei ha u snem 2020, ka BJP ka la ïoh knieh noh ïa ka bor synshar na ka Congress da ka jingphet noh uwei na ki nongïalam Samla jong ka Congress u Jyotiraditya Scindia uba la ïalam ruh bad bun ngut ki MLA kat haduh ban da pynkhyllem ïa ka sorkar Congress.
Hadien jong kane, kiba bun ki la pyrkhat ba ka Congress ka lah ban wan biang ha ka bor bad ki Exit Poll ruh ki pyni ba ka don ka jingïakhun kaba itynnad ha kane ka jylla ba hapdeng ka ri India. Phewse, kam shym la long kumta namar ba ka BJP ka la jop kput bad tam bun na ka Majority Mark. Ha Rajasthan, ka BJP ka la ïoh knieh biang ïa ka bor synshar hadien san snem ba la synshar da ka Congress hapoh ka jingïalam u riewtymmen ka Congress u Ashok Ghelot. Ha Chhatisgarh, shuwa ka elekshon kiba bun ki la pynpaw ba ka Congress kan ïoh ban thaw sorkar biang namar ka jingtreikam bha jong ka sorkar ba ka Congress ka la ïalam. Wat ki exit poll kiba bun ruh ki pynpaw kumta. Hynrei ynda ladep ñiew vote ka BJP ka la jop.
Ki nongpeit pyrman, ki la ong ba kane ka jingjop jong ka BJP ha kine ki lai tylli ki jylla, kaba nyngkong kadei na ka daw jong u Narendra Modi ha kaba ka nam jong u ka la nang ïai kiew katba nang mih ki sngi. Ha kine ki jylla, i nongïalam ka BJP ha ki jylla kim dei kiba da paw bad ka BJP haba ka la ïohi ïa kane, kala pyndonkam da u Modi ban leut ïalap elekshon da kaba pyni ruh ïa ka jingtreikam jong u ha ka sorkar pdeng. U Modi u la pyllut por bha kine ki jylla bad kane ka jingleit jong u ryngkat bad ka nam kaba u don, ka la pynlong ïa ka BJP ba kan jop. Kane ka la long ruh ha Rajasthan, ha kaba ka BJP ka la pyndonkam da u Modi namar ka jingbym ler ki nongïalam ka BJP ha kane ka jylla.
Nangta ka daw kaba ar kadei ka jingpyntreikam ka sorkar pdeng ïa ki skhim kiba dei na ka bynta ki longkmie, namar kine ki jylla kidei kiba khlaiñ bha ka jingdon vote ki Kynthei. Ki skhim kyrpang na ka bynta ki longkmie, ka la khring ïa ki nongthep vote kynthie na kine ki lai tylli ki jylla. Ha Madhya Pradesh, ka sorkar BJP ka la pyntreikam bha ruh ïa ki skhim na ka bynta ki longkmie bad kane ka la pynlah ïa ka BJP ban leh bha ha kane ka elekshon. Ha Chahtisgarh, wat lada ka Congress ka la pynkhlaiñ bha ïa ka rukom ïalap elekshon, pynban ka nam bad ka jingtreikam u Modi ka la tap lut ïa ki jingtreikam ka sorkar Congress ha kane ka jylla bad ki jingïalap elekshon jong ki heh ka Congress kynthup ïa u Rahul Gandhi kim shym la lah ban ïa ai reng bad u Modi.
Ha Telangana pat kawei na ki jylla ba shathie jong ka ri India ne ki South Indian State, ka BJP kam shym la lah ban thaw pyrthei, namar ka Congress ka la trei jubor, khamtam ba kane ka jylla kam dei ka jylla kaba kren Hindi. Ki paidbah ki la jied ïa ka Congress namar ka jingpyrshah ïa ka jingtreikam u K. Chandrasekhar Rao la 9 snem, ha kaba ka la don ka jingkynnoh ba ka la don ka jingbamsap bad ka jingbym treikam bha ka sorkar jong u.
Ha Mizoram ka sorkar Mizo National Front ba la ïalam da u nongïalam Seng lehnoh ba mynshuwa kaba la synshar bun snem bha, ki paidbah ki la jied noh ïa ka Zoram Peoples Movement, kaba dei ka Kynhun ïatreilang jong ki hynriew tylli ki Seng Riewlum ha kane ka jylla da kaba kyntait noh ïa ka jingtreikam bym hun bad bym hok jong ka MNF, ka Seng kaba la kylla na ka Seng lehnoh sha ka seng Saiñpyrthei ha u snem 1986 hadien ba ka Mizoram ka la ïoh la ka jong ka jylla.
