Shillong, Nohprah 04: Ka kynhun ki thei ïalehkai Basketball ba mihkhmat ïa ka jylla hapoh ka lama jong ka Meghalaya Basketball Association (MBA), ka la ïai bteng ïa ka lynti ïaid da ka namjop kaba ar sien lynter sa hynne ka Sngi pyrshah ïa ka Jharhand ha ka jingïakhun ki kynhun ka thup Group-E.
Hynne ka sngi, ki thei ïalehkai ka jylla kiba la jop da 53-25 point ïam ka Assam ha ka sngi sdang, ki la ïai bteng ban sei madan ïa ka sap ïalehkai kaba kyrpang jong ki ban tehlakam ïa ka jingïakhun bad ban jop da kaba suk da 43-13 point ïa ka Jharhand.
Lyngba kane ka namjop, ka kynhun ki thei ka jylla ki la nang ïoh jingkyrmen shuh shuh ban dang ïohrung sha ka wat ba bud jong kane ka lympung 73rd Senior National Basketball Championship kaba la pynlong ha Ludhiana (Punjab).
Katba ka kynhun ki rangïalehkai ba mihkhmat ïa ka jylla ki la mad biang ïa ka namrem ar sien lynter, bad hynne ka sngi ka long pyrshah ïa ka Mizoram. Ha kane ka jingïakhun, ka kynhun ki shynrang ka la shah pynliem da 60/82 point ha ka Mizoram na ka Group-C.
Ki thei ka Meghalaya kin aireng sa ïa ka Telangana mynta ka sngi ha ka por 12: 15 baje mynsngi, katba ka kynhun shynrang kan aireng sa ïa ka Goa ha ka por 7 baje mynstep.
