Jowai, Nohprah 04: Ka kynhun ïalehkai jong ka Ladthadlaboh ka la buh jaka ïalade sha ka final jong ka lympung Super Division Football Tournament 2023 bala ai kyrteng ‘U Kiang Nangbah Memorial Trophy 2023’ hadien ba ka la khur namjop ha ka jingïakhun semi final.
Ka West Jaiñtia District Sports Association, (WJDSA), Jowai, kaba pynïaid ïa kane ka lympung, ka la ïoh ban pyndep ïa ka jingïakhun semi final ba nyngkong hynne ka Lah Sngi U Blei ha madan Kiang Nangbah Stadium, Dongmihsngi Jowai.
Ha ka jingïakhun, ka Ladthadlaboh kala jop salit da 1-0 kol ïa ka Sailung Ialong. Ka shi kol ba la thep da u Promi Suting shuwa ban kut artad ka por, kata ha ka 90+1 minit ka la biang pura ïa ka Ladthadlaboh ban pynliem ïa ka Sailung Ialong. Lyngba kane ka namjop, ka Ladthadlaboh ka la ïoh ban buh jaka ïalade ha ka final jong kane ka lympung.
Ka jingïakhun Semi Final ba ar kan long mynta ka sngi (5 tarik Nohprah) hapdeng ka 7 Wasa United pyrshah ïa ka Nangbah Mulang haka por 1 baje nohphai sngi, ka kynhun ba jop haka Semi Final ba ar kan ïakhun bad ka Sailung Ialong haka Semi Final ba lai jong ka 9 tarik ki ban ïoh rung sha jingïakhun Final.
