Ka jingïalang paidbah ka VPP halor ki mat bad Lumpongdeng ka dei tang ka buit ïalap elekshon MP shiteng samoi: Dy.CM

Shillong, Iaiong 21 : U Symbud Myntri Rangbah ka Jylla u Bah Sniawbhalang Dhar ha ka sngi Ba-ar, ula kynthoh ba ka jingthmu pynlong rally ne jingïalang paidbah da ka liang pyrshah Voice of the People Party (VPP) halor ki mat kynthup ka project dewlynnong Lumpongdeng ka dei ka buit ïalap na ka bynta ka elekshon shiteng samoi ka Shillong Lok Sabha.
“Ka rally paidbah jong ka VPP ka dei namar ba ki la sdang ïa ka jingïalap na ka bynta ka elekshon shiteng samoi ka Shillong Lok Sabha. Ngi ruh ngin sa sdang noh ïa ka jingïalap elekshon lehse ha u bnai ban wan” ong u bah Sniawbhalang haba ïakren bad ki nongthoh khubor.
Haba kdew ïa ka rai jong ka Sorkar Jylla ban pyllait noh ïa ka dewlynnong Lumpongdeng na ka project Taj Resort & Spa, ula ong “Ka jingkren u Symbud Myntri Rangbah Bah Prestone Tynsong bad Myntri Sorkar Bah Wailadmiki Shylla ka la shai bha bad ka dei kumne hi naduh kaba sdang”.
Haba kylli la ka VPP ka pynkylla sohpdung ïa ka NPP, u Bah Sniawbha ula ong “Em, ka dei ka kamram jong man ki seng saiñ pyrthei ban ïalap na ka bynta ka elekshon shiteng samoi, hynrei lehse ki kwah ban pyndonkam ïa kane ka mat kum ka mat ïalap elekshon, kane hi ka shong ha ki”.
Halor ka jingtyrwa jong u ban pynkynriah noh ïa ka 5-Star Hotel na Umiam sha Wahiajer lada ki briew ki pyrshah, ula ong “Phi ïohi, ngi long kiba pdiang beit ïa ka roi ka par. Mynta naba ka Sorkar kala sngap ïa ka sur jong ka Synjuk ki Rangbah Shnong ka Ri-Bhoi District ngi (Sorkar) la pynbeit ïa kane ka kam”.