Ka jaitbynriew Khasi ka don bun kiba stad naduh por hyndai hynthai, ong u MP Rajya Sabha

Shillong, Naiwieng 16: U MP ka Rajya Sabha na ka seng NPP u Dr. W R Kharlukhi ha ka jingrakhe ïa ka lyngkhuh sngi khlad kaba 114 jong u Babu Rabon Sing Kharsuka u la ong ba une u nongthoh kot u la dei uba stad bad uba ïohi jngai uba la ïohi ruh ïa ka jingdonkam ban pynneh pynsah ïa ka niam lyngba ka kot kitab kaba u la thoh kaba ai kyrteng ka Kitab ka Niam Khasi mynba u dang im ha kane ka sla pyrthei.
U la ong ba ka jaitbynriew watla ka juleh burom ïa ki riewïaleh laitluid kiba la pyndonkam da u sum bad ka ryntieh kumta ruh donkam ban pynsahnam ïa une u nongthoh kot uba la nohsynniang ïa ka jaitbynriew khasi.
“U la la shim ïa ka jinglenlade na ka bynta ka jaitbynriew Khasi bad kumjuh ruh i kurim jong u i Riangmai Lyngdoh Buam. Ka jaitbynriew Khasi kadei kaba stad. Haba kren shaphang ka sawdong sawkun ne ka environment ki tymmen hyndai ne ki longshwa manshwa ki la pynneh ïa ka sawdong sawkun, ki la pynneh ïa ka jingpynkup bor ïa ki kynthei naduh hyndai, ngi la don ka jingmut synshar paidbah naduh hyndai,” ong u MP ka Rajya Sabha.
Haba ai jingmut ïa ki samla pule ka NEHU bad kiwei ki samla pule khasi u la ong ba haba pule wadbniah dei ban peit ruh ïa kaba rim, ym dei ban ïanujor tang ïa kaba mynta. “Dei mangi kiba pynduh ïa ka ILP, naba ha ki por kiba mynshwa u kñi ne u mama u dei uba donbor bha ha ka imlang sahlang bad kane kadei ka jingstad u mynbarim. Ki scholar mynta kidei ban long ki stad pyrkhat ha kane ka juk bad ban bud ruh ïa ka tynrai ba la leh da ki longshwa manshwa,” bynrap u MP.
Katba u Bah F R Kharkongor IAS Principal Secretary Art’s and Culture ka sorkar jylla u la ai khublei ïa ka ïing ka sem jong i kong Eldora Betsy Lyngdoh bad u Bah Ransom Sutnga kiba la ïaibteng ban kynmaw burom ïa u ne u nongthoh kot uba don ruh ka jingïadei bad ka ïing ka sem jong ki.
“Nga ai khublei ïa ka ïing ka sem jong i Bah Ransom Sutnga bad kong Eldora Lyngdoh kiba la ïai kynmaw ban rakhe kynmaw burom ïa une u nongthoh kot ki Khasi naba bun na ngi ngim tip shuh. Ka jaitbynriew kaba don ka tynrai ba skhem kadei kaba lah ban ïaid shakhmat bad lada khlem ka tynrai kadei ka jaitbynriew kaba ïap. Ïa i Babu Rabon la khot kum i nongpynim ïa ka tynrai Khasi. Kaei kaba donkam mynta ka long ban pynrung ïa ka Ktien Khasi hapoh ka 8th schedule khnang ba kan long kaba riewspah,” ong u Bah Kharkongor.
U la ong ba kaei kaba donkam mynta ka long ban pynroi bad pynriewspah ïa ka Ktien Khasi.
“Ka lah dei bha ka por ban burom ïa kine ki khraw pyrkhat ym tang ban shu leh burom hynrei ban buh da ki jingthoh kiba lah ban ai jingtip ïa kane ka pateng kaba mynta,” u la ong.
Ha kaba ïadei bad ka jingtyrwa ban lehburom ïa une u nongthoh kot u la pyntip ba ka tnat Arts and Culture ka la pdiang ban tei ïa u mot jong u Babu Rabon Sing Kharsuka bad kane kan sa long ha u snem ban wan ban kynmaw ïa ki jingnoh synniang jong u.
“Ka lah dei ban don ka digital representry, ban thep ha ki digital epaper ïa ki jingthoh jong Babu Rabon Sing naba ki khynnah mynta ki la shah khring bha ban pyndonkam ïa ka social media kumta kane kan ïarap ïa ki ban tip bha shaphang jong i,” ong u Bah Kharkongor.
Haba ïathuh ba ka la don ka CM research grant kaba ka sorkar ka ai T. 3 lak ïa kawei kawei ka kam wadbniah, na ka liang jong u la pynshlur ïa ki samla pule ban pynleit jingmut ha kane ka kam wadbniah kiba la jia ha ki por mynshwa khnang ba kane ka pateng ba mynta kan tip.
Ïa kane ka jingrakhe ïa ka 114 death anniversary jong u Rabon Sing Kharsuka la pynlong da ka Rabon Sing Kharsuka Memorial Committee, ka Linguistic department NEHU bad ka thiar Lyngwiar Dpei Society bad ha kane ka prokram la sam ruh ïa ki khusnam sha ki samla kiba la ïoh mark heh ha ki jingpule BA bad MA ha ka ktien Khasi.
Ha kawei pat ka liang haba ai jingkren shaphang u Babu Rabon u Dr. Sylvanus Lamare, Principal barim ka St Edmunds College u la ïathuh ba ka jingphawar kadei kaba don tang ha ki Khasi. “Ka ïing ka sem jong i Kong Eldora ka la leh kaba dei eh ban dang ïai kynmaw biang ïa u pahep Rabon uba bun ngi la thap klet. Ha kane ka spah snem ba 21 dang don ka niam Khasi kaba la thoh da i pahep Rabon ïa ka niam Khasi. Lada ngi kynmaw burom ïa ki nongïaleh laitluid kiba pyndonkam da u khnam bad ka ryntieh ngi donkam ruh ban burom ïa kiba la synniang ha ka thoh ka tar ban pynim ïa ka tynrai u Khasi. Nga kyrpad ruh ïa ka sorkar ban buh ïa kane ka sngi ka 16 tarik kum ka Rabon Sing memorial day,” u la ong, watla kam da donkam than ban ai da ka shuti.
La pynïaid ïa ka jingïalang da ka Prof. Streamlet Dkhar, la kren pdiang da Dr. Saralin A Lyngdoh Head Department Lingguistics, la ai ka presentation shaphang ka jingim i Babu Rabon da i kong Eldora Betsy Lyngdoh Chairperson bad Organising Secretary ka RSK Memorial Committee ha ka jingdonlang u Co-Chairman ka MIDC.