Shillong, Rymphang, 17: U Myntri Rangbah barim ka Jylla Dr Mukul Sangma ha ka sngi Thohdieng, ula pynpaw ba ka rai jong ka Sorkar Jylla ban bujli ïa ka Single Window Agency (SWA) da ka Investment Meghalaya Authority (IMA) ka dei ban pynthikna ïa ka jingtreikam kaba shai, ba khuid, lait na ka leh shilliang khmat bad pynduna ïa ka jingjied briew bad jingbamsap haba mynjur ïa kino kino ki jingtyrwa sengkam sengjam hapoh ka Jylla.
Ha ba iakren bad ki nongthoh khubor, u Dr Mukul ula ong ba ka jingthmu hi ka dei ban long kaba khring ïa ka jingwan sengkam da kaba pynthikna ba baroh ki jingdonkam ba hap pynkhreh bad ki jingeh kiba buh ïa ki nongsengkam, ki dei ban long kiba duna bha.
“Kane ka dei ka jingdonkam namar ki nongsengkam ki don ïa ki lad ki lynti ha baroh kawei ka Ri bad ha baroh kawei ka Pyrthei, kumta ka jingthmu ban pynaram ïa ka jingsengkam ka dei kaba hakhmat eh” ula ong
Ula ong ba ka long kaba donkam ruh ban pynthikna ïa ka rukom treikam kaba shai bad ka ban pynduna ïa ka jingjied briew bad ka jingbamsap.
