Shillong, Rymphang, 17: Ka Kong Simi Khongtiang kaba dei ka nongshna phlim na kane ka jylla Meghalaya ka la jop ïa ka khusnam kum ka “Best Director” na ka bynta ka phlim ‘Ka Chithi’ ha ka Prag Cine Awards, 2024, North East India.
Ïa ka Prag Cine Awards, 2024, North East India la pynlong ha nongbah Jorhat, Assam ha ka sngi Thohdieng ha kaba la ïashim bynta da ki nongpynmih phlim, ki nongshna phlim, ki tyngshop bad ki puron na kylleng ki jylla jong ka thaiñ Shatei Lammihngi.
Ïa ka phlim “Ka Chithi” kaba dei ha ka ktien Pnar la jied ha ki lai bynta, kata, ha ka “Best Film”, “Best Actor (Female)” bad “Best Director.”
Ka Kong Simi Khongtiang, ka la pynpaw ba kane ka dei ka jingkmen bakhraw ïa ka kynhun jong ka kynhun ka phlim ‘Ka Chithi.” Ka la ong ruh ba ki dang don shibun ki phlim ba la shna na ki jylla ka thain Shatei Lammihngi kiba la shah jied na ka bynta kane ka khusnam.
Kum ka Director, kane ka dei ka sien baar ba ka la shah jied ban ïoh pdiang ïa kane ka khusnam hynrei ha u snem 2018 kam shym la jop satia hynrei ha kane ka kynti ba mynta ka la ïoh ïa ka jingjop da kaba ïoh khur ïa ka khusnam.
