Khliehriat, Nailar, 20: Ka shnong Bataw, kawei na ki shnong ba la rim bha ha East Jaiñtia Hills District, kaba don shibun kiei kiei kiba phyla hapoh shnong kum ka Pung Umhang, ka ïew ha trai ki dieng jri kine ki don ruh la ki khana tang naduh hyndai, kaba sngewtynnad ka long ba kane ka ïew ha trai ki dieng jri ka la khie im biang naduh u snem 2012, kaba dei ruh ka ïew ba la buh seng bad buh nongrim da ki longshwa naduh ki por hyndai, kane ka ïew ka don ruh hajan bha bad ka pung Umhang.
Katkum ka jingiathuh u ma Miatlang Suchiang, uba na ka shnong Bataw u ong ba ki shnong kiba ju wan ïew ha Bataw, ha ka sngi ïew kaba ju pynlong shi sien shi taïew, ki kynthup ki briew kiba na ka shnong ba khappud kum na shnong Lakadong, Ladlakadong, Umlynsha, Umlatdoh, Ummat, Lama bad na kiwei kiwei ki shnong ba don ha khappud ruh.
La ong ruh ba kane ka ïew ka dei ka wei na ki ïew kiba paw bha ha ki por hyndai ka dei ruh ka ïew kaba la rim bha ha kaba ngi lah ban ong ruh ba ka dei ka ïew khappud ba paw bha ka ki por hyndai, shipor kane ka ïew ka la jah hynrei sngewtynnad ban tip ba la pyn khie im biang ïa kane ka ïew dei naduh u snem 2012.
Ka long ruh ka iew kaba itynnad bad ba kham pher namar ki nongshong ïew ki shong ruh ym tang ha ki trep hynrei ki shong die jungdie ruh halor ki maw kiba long kum ki mawbynna kiba don ha trai jong ki ar tylli ki dieng jri kiba heh kiba piar bha ki tnat.
