Jowai, Nailar 20: Ban pynbha shuh shuh ïa ka rukom treikam jong ki nongtrei ASHAs hapoh ka Amlarem Civil Sub-Division Amlarem, hynnin ka sngi 18 tarik u Nailar la sam da ki Mobile Tablets sha ki ASHA ha ka jingïalang ba la pynlong ha ophis ka Amlarem C&RD Block, Amlarem, West Jaiñtia Hills District.
Ha kane ka sngi la ïadonlang naduh u MLA ka thaiñ uba dei u Chief Adviser jong ka sorkar jylla ma Lahkmen Rymbui, ha ryngkat u Subdivision Officer Dr. Abishek Saini, IAS, Block Development Officer ma G.L.C Mylliem, Additional District Medical Officer Dr. K Dhar, District Nodal Officer Non-Communicable Disease Control Programme (NCDCP) Dr Maria Syngkon, Block Medical Officer Amlarem Dr Arvind Khonglah nalor ki nongtrei jong ka tnad ka koit ka khiah.
U ma Lahkmen Rymbui kum u kongsan haba ai jingkren ula pynsngew ïa ka jingdonkam ban leh ïa ka Check-ups man ka por na ka bynta ka koit ka khiah jong u briew. Ula kdew ruh bunsien ki briew kila klet noh ban sumar ïa ka koit ka khiah naduh ka jingpang Shini (Diabetes), high blood pressure, stroke bad kiwei de ki jingpang .
Ula pynsngew donkam ïoh ka jingsumar ha ka por kaba biang khnang ban ïada ïa ka jingpang jingshitom jong ki, kumta u khot ïa ki nongshong shnong ba kin long kiba sumar ïa ka koit ka khiah, ula ong na ka liang jong ka sorkar ruh kala pyrshang ban ai da ki Tablets khnang ban kham pynsuk shuh shuh ïa ka rukom treikam ki ASHA ha kino kino ki jaka.
Na ka liang Dr. Dr Arvind Khonglah ula ong ka jingsam ïa kitei ki Mobile tablets sha ki nongtrei ASHAs kan ïarap shibun eh ban ïoh pyndep ïa ka kamram jong ki ha kylleng ki shnong bad ki jaka kiba hap hapoh ka Amlarem Block.
