Ka FOCUS kam dei ka skhim NPP ka dei ka skhim ka sorkar MDA wat kynnoh kulmar : Kyrmen

Shillong,Nohprah 20 : U Myntri sorkar ba peit ïa ka tnad Social Welfare, uba dei ruh uwei na ki nongïalam ka UDP u ma Kyrmen Shylla u la ong mynta ka sngi Ba Ar ba ka skhim FOCUS kam dei ka jong ka NPP kumba la kynnoh da kiba bun hynrei ka dei ka skhim jongka sorkar MDA na ka bynta ki paidbah.
U ma Kyrmen u la ong “ Ym don kino kino ruh ki seng saiñ pyrthei kiba lah ban kam trai ïa kano kano ka skhim ba pyntreikam da ka sorkar hapoh ka jylla. Namar kino kino ki skhim ba ai sha ki paidbah ki dei ki jongka sorkar. Kumta ka jingkynnoh da ki katto katne ba ka skhim FOCUS ka dei ka skhim NPP ka long ka bym dei satia namar kane ka skhim ka dei jongka sorkar jylla bad ka UDP ruh ka don bynta ha kaba pyntreikam ïa kane ka skhim” ong u ma Kyrmen.
U la ong lada u myntri rangbah ne ka NPP ki kam ba ka FOCUS ka dei ka skhim jong ki te ki la bakla. U la ong bunsien ki jingkynnoh ki ju jia beit khamtam haba la jan ka election, hynrei ki paidbah kim dei ban shah ïalam bakla ki dei ban pdiang beit ïa kane ka skhim namar ka sorkar ka pyntreikam na ka bynta ka jingmyntoi jong ki paidbah.
Lada kito ki seng saiñ pyrthei ki kynnoh ïa u Myntri Rangbah halor ka FOCUS ka long kaba shisha kata ki paidbah kin sa bishar hi hynrei lada kam long kaba shisha ki paidbah ki tip aiu kin leh kylla ïakita kiba kynnoh pyrshah,ong u ma Kyrmen.