Shillong, Nohprah, 20: Ka Coordination Committee on International Border (CCIB) ka la sngi Baar ka la pynpaw ba ka kam pyrshah ïa ka jingker sainar shiah ha khappud hynrei ka la dawa ïa ka Sorkar ba ka jingker sainar ka dei ban long na u Zero Line uba pynïakhlad ïa ki shnong khappud khappud jong ka jylla Meghalaya bad ka ri Bangladesh.
Ha ka jingïakren bad ki lad pathai khubor u Chairman jong ka CCIB u Bah Sukkynjai Myrchiang u la ïathuh ba naduh 3 tarik mynta u bnai ki bor Sorkar ki la hiar sha ka shnong Rhongkum kaba hap hapoh u pud u sam jong ka Amlarem Civil Sub-Division ban phah sdang noh ïa ka jingker sainar wat hapdeng ka jingpyrshah jong ki paidbah khamtam eh na ki trai jaka.
U la ïathuh ba ha ka 5 tarik mynta u bnai na ka liang ki dkhot jong ka Khasi Student Union (KSU), ka Hynñiewtrep National Youth Front (HNYF) bad ka Federation of Khasi Jaiñtia and Garo People (FKJGP) ki la leit sha ka shnong Rhongkum ban phah pynsangeh ïa kane ka jingker sainar shiah ba la sdang ker naduh ka jingjngai kaba 150 Yard na u mawpud.
“Ngi dap da jinglyngngoh ban lap ba ki bor Sorkar ki la ïathuh ba ki la ïoh jingbit na u Bah Wanshalan Dhar ban ker sainar namarba ka Sorkar ka ladep ban siew ïa ka bailutksan sha u Bah Wanshalan bad sha ka ing ka sem jong u,” ong u Bah Myrchiang.
U la ïathuh ba ka CCIB ka dei ka kynhun kaba don lang ki sengbhalang bad ki trai jaka ha ki thaiñ khappud bad naduh ki snem ba la leit ka CCIB ka la pynpaw ïa ka jingpyrshah ban ker sainar shiah ha ka jingjngai 150 Yard na u mawpud bad ka ri Bangladesh namarba ki trai jaka kin duh lut ïa la ki jaka puta kiba dei ki jaka rep ki jong ki.
