Ngim sngew lyngngoh shuh ba kin phet na ka Congress bad leit pynïasoh sha ka NPP : Pala

Shillong, Nohprah 20: U President jong ka Meghalaya Pradesh Congress Committee u Bah Vincent H Pala ha ka sngi Ba-ar u la ong ba ka party kam kyndit ne lyngngoh shuh halor ka jingleit pynïasoh ki arngut ki MLA barim jong ka Congress sha ka NPP namar ka party ka la dep tip lupa.
“Kam pynkyndit shuh ïa ngi kum ka party ïa ka jingleit pynïasoh ki arngut ki MLA barim kiba la jop na ka tiket Congress ha u 2018,” u la ong u Bah Pala haba kynthoh halor ka jingpynïasoh NPP ka MLA barim ka East Shillong ka Kong Ampareen Lyngdoh bad kumjuh u MLA barim ka West Shillong u Bah Mahendro Rapsang.
U Bah Pala u la kam ba ka party ka la pynkhreh bha ïa ka elekshon na kitei ki constituency bad ka la dep rai ruh ban sei ïa ki kyrtong kiba don jingkyrmen na bynta ka elekshon 2023.
“Ha ka jingshisha ki (Amapareen bad Mahendro) dei ki kyrtong kiba kynsai hynrei ka jingkwah jong ki ban leit sha BJP ka long kaei kaei kaba sngewsih. Lada ki sngew ba ka long kaba bha na bynta jong ki ban leit pynïasnoh bad ka seng kaba pynïaid da ka BJP ngim don eiei ba kynthoh ïa ki,” u la ong.
Haba ïadei bad ka jingkam ka Kong Ampareen ba ka Congress ka la dep ban ban pyni jingkhang lupa ba kin mih noh na ka party u Bah Vincent u la ong, “Ngi pyni jingkhang ha kata ka rukom ba ngim kwah ban don jingïadei eiei bad ka BJP. Hato ngin shu aili mo ba kin leit ïasnoh kti bad ka BJP. Ym pat ju jia koit ha ri India ba ka Congress kan ïatreilang bad ka BJP bad kata ka jingplie ne jingkhang ka jyngkhang ka party ïa ki san ngut ki MLA ba shah sospon kam don eiei bad ngi. Ki la leit ban ïasnoh bad ka sorkar kaba ïalam da ka BJP bad ka NPP kumno kum ka party ngin shu aili ïa ki,” u la ong.
U la kam ruh ba ka jingleit pynïasnoh jong kine ki MLA barim ka East Shillong bad West Shillong kan ym ktah eiei ïa ka Congress ha kane ka elekshon ban wan.