Jowai, Nohprah 05: Ka Bible Convention bad ka jingduwai jingisnei jingblei ïa kiba pang kiba shitom ba ar sngi ha Divine Mercy Retreat Centre Ladarymbai, Good Sherpherd Parish East Jaiñtia Hills ha kane ka 3 bad 4 tarik mynta u bnai (03+04/12/2022) ka la long ka jingmyntoi ïa kito kiba wan sha kane ka Bible Convention bad ka jingpynkoit ïa kiba pang naba kito kiba pang mynsiem ki ïoh ïa ka jingpynkoit pynkhiah lyngba ka Sakrament ka jingkylla kaba mut bad ki nongpang haka liang ka met katto katne ngut kila ïoh ïa ka jingkoit jingkhiah na ki jingpang jong ki kaba la bat slem ïa ki da ki snem kaba ki la pyrshang ban dih dawai na ki jaka ai dawai ki bapher bapher bad kiba dang kem pang ha kine ki khyndiat bnai bad sngi ba la dep.
Une u Nongthoh uba la ïohlad ban wan ïashim bynta ha kane ka Bible Convention, ha man la ka session ba u Phadar Antony Aluvassery V.C, u pynlong ïa ka jingduwai na ka bynta kiba pang bad hadien ka jingduwai u kylli na ki bapang da kaba ong “Kino kino kiba pang kiba sngew ba ki la ïoh jingkoit jingkhiah sngewbha ieng lane rah kti” bad don na kiba pang ki la rah kti bad ieng na ki jaka shong jong ki bad da ki khmat kiba kmen bad phuh samrakhie ki thapkti bad ruwai ïaroh ïa U Blei ba lyngba ka jingduwai u Shakri jong U (Blei), u Phadar Antony Alussery V.C, U Blei ula sngap bad kila ïoh biang ïa ka jingkoit jingkhiah na ki jingpang kibapher bapher kaba la bat ïa ki da ki snem ïa kaba ym shym la ïarap da ki dawai na ki jaka sumar bad na ki dawai Kymbat (Kabiraij).
Ïa kine kiba pang kiba la ïoh biang ia ka jingkoit jingkhiah, une u Nongthoh u la ïohlad ban ïa kynduh bad ïa kren ïa ki katto katne ki Nongpang kiba la ïoh biang ïa ka jingkoit jingkhiah lyngba kane ka Bible Convention bad jingpynkoit ïa kiba pang. Ki Nongpang kiba la ïoh ïa ka jingkoit jingkhiah ia kiba ym shym la kwah ban pynpaw kyrteng ha kane ka jingthoh, haba ïathuh ha une u Nongthoh, don ki Nongpang kiba la pang la kumba 5/6 snem, kiba la dih dawai na ki jaka sumar ki bapher bapher hynrei kan shym la ïarap bad da ka jingisnei jong U Blei da ka jingwan jong ki ha kane ka Bible Convention bad jingpynkoit ia kiba pang ki la ïoh biang ïa ka jingkoit jingkhiah. Don ruh ki Nongpang kiba la ïoh ïa ka jingkoit jingkhiah ha ki Bible Convention ha ki convention kiba la pynlong da kane ka Retreat Centre Ladrymbai ha ki snem kiba la leit noh kiba la ïoh ïa ka jingpynkoit na ki jingpang jong ki, kine ruh byllai ki la wan, wan ïaroh ïa U Blei bad ïathuh ha une u Nongthoh ïa ka jingïoh biang jong ki ïa ka jingkoit ka jingkhiah, ïa ka jingmanbha man miat ha ka trei ka ktah, ha ka kha-I ka khaba bad kiwei de ki jingkyrkhu kiba ki la ïoh ha ka ban bha ban miat ka longbriew man briew.
U Phadar Antony Aluvassery V,C, u Nongduwai uba kongsan ha kane ka Convention, u la pyllait ia ka por ba kordor jong u ban ïa kren bad une u Nongthoh bad haba une u Nongthoh u la kylli lano pat phin wan biang sha Retreat Centre Ladrymbai? U Phadar Antony u ong ka por kam shah naba u hap leit na kawei ka jaka sha kawei ka jaka ban kyrpad ïa U Blei bad ïa ka jingisnei jong U ( Blei) ban ïarap ïa ki briew kiba donkam ïa ka jingïarap jong U Blei.
Une u Nongthoh u la ïohlad ruh ban ïa kren bad u Phadar Anthony Colenchery, Director ka Divine Mercy Retreat Centre Ladrymbai bad la ong wat lada ki Nongduwai jingpynkoit pynkhiah ïa kiba pang kim lah ban wan kiba nabar ka jylla Meghalaya, hynrei pat man ka la ka sngi Saitjaiñ jong ka taiew kiba kwah jingduwai ki don ki nongduwai ha kane ka Divine Mercy Retreat Centre Ladrymbai, East Jaiñtia Hills District, pynkut u Phadar Anthony Colenchery, Director ka Divine Mercy Retreat Centre Ladrymbai.
Kumban shu pynkynmaw ha kane ka 4 tarik ha shwa ban sdang ïa ka jingduwai jingpynkoit pynkhiah ïa kiba pang kiba niun la don ka Bible proseshon (procession) kaba la lamkhmat da ki nongshad ka shadtynrai (traditional dance), ka jingkren pdiang sngewbha ïa baroh ki nongwan ïashim bynta da ka kong Jobly Dkhar, ka jingruwai ïaroh ïa U Blei bad ia ka ktien jong U, nangta bud sa ka jingknia Mass Iukharist bakhuid, ka jingknia pan map iala ki lait ki let, ka jingpan jingkyrkhu kyrdoh bad ha ka juh ka por ka jingkñia ainguh na ka bynta ki jingaiei kiba bun kiba u (Blei) U la ai. Ia ka jingkñia Mass Iukharist bakhuid la lamkhmat da u Phadar Aibor Nangbah, Parish Priest ka Good Sherpherd Parish Ladrymbai u Nongknia Rangbah duh, ha ka jingïasynran lang bad kiwei de ki Phadar (Lyngdoh Sohblei) kiba wan na ki parish ba marjan.
Ha kane ka jingkñia Mass Iukharist da ki spah ngut ki paidriewngeit ki la ïashim bynta ha ka ïabam ka ïasip ïa ka Iukharist Bakhuid kaba long ka Met bad ka Snam jong U Trai Jisu Khrist.
