Bengaluru, Ïaiong 18 : U kapten jong ka kynhun ïalehkai hockey ka Ri, u Harmanpreet Singh ha ka sngi Ba-ar u la ong ba ka Asian Champions Trophy kaban long shen ha Chennai kan long kum ka jingtynjuh ïa ka kynhun ïalehkai ka Ri kaba pynkhreh pat na bynta ka lympung kaba kham heh, kata ka Asian Games kaban long ha u Nailur – Risaw jong une u snem.
Katei ka lympung ïalehkai kaba 7 jong ka Asian Champions Trophy la buh ba kan long naduh ka 03tarik Nailar haduh 12tarik Nailar kaba long artad kum ka lympung sdang na ka bynta ka lympung kaba kham heh kaban long ha Hangzhou ïa kaba la tip kum ka Asian Games ha u Nailur.
Kane kadei ka lympung kaba baroh ki kynhun kin ïa knieh ban ïoh khur ïa ki takma ksiar khnang ba kin ïoh pat ban mihkhmat ha ka Paris Olympic Games.
“Na ka bynta kiba bun nangi, kan dei kasien kaba nyngkong eh ba ngin ïoh ban ïalehkai ha Chennai. Nga kynmaw kumno ki nongïalehkai kiba la kham rim kiba ju ïathuh shaphang ka Asian Cup kaba long ha u snem 2007 ha Chennai namar ka long ka lympung ïalehkai kaba khraw bha na bynta ka India ha kaba ka la ïoh ban khur ïa ka nam lahduh,” ong u Singh ha ka kyrwoh.
Shuh shuh u ong ba katei ka lympung ka long ruh ka jingtynjuh ïa ka kynhun baroh kawei ban ïohi haei ki don kum ka kynhun namar ki hap ban kynduh biang ïa kijuh ki kynhun kiba ka kynhun ka hap ban aireng ha ka Asian Games.
“Kane kan ailad ruh ïangi ba ngin sngewthuh khambha ïa ka jingkhlain jong ka Liang Pyrshah bad ruh ba ngin ïoh pat ban pynkhreh khambha ïalade na ka bynta ka Asian Games kaba ngi buh thong ba ngin ïoh ban khur ïa ka takma ksiar bad ïoh rung beit beit sha ka Paris 2024 Olympic.”
Ka India ka la khur ïa ka nam lahduh jong ka Asian Champions Trophy ha ka snem sdang, kata ha u snem 2011 bad ruh ha u snem 2016. Katba ha u 2018 pat ki la ïoh ban ïa sam lang ïa ka khusnam jingjop bad ka Pakistan hadien ba u slap u la pynthut noh ïa ka jingïakhun ha Muscat.
