Shillong, K’lyngkot, 04: Ka Shillong All Faiths Forum (SAFF) ha ka sngi Balang ka la pynrem jur ïa ka jingshah thombor ki Khristan bad ka jingpynjulorr ïa ka iingmane ha Narayanpur District ka Jylla Chhatisgarh kaba la jia ha ka Lah Sngi u Blei mynta ka taiew.
“Ki dkhot ka SAFF ki dap da ka jingsngewsih halor ki jingjia pyrshah ïa kano kano ka jingngeit lane ka jaidbynriew. Ka SAFF ka pynrem jur pynrem jur ïa ka jingshah thombor ki Khristan bad ka jingpynjulor ïa ka iingmane ha Narayanpur District ka Jylla Chhatisgarh. Ka jingpynjot ïa ki tiar khuid ka long kaba ishyrkhei bad kaba dei ban ïoh jingpynshitom ha Uba najrong,” ong u kyrwoh ba la phah da u Secretary ka SAFF u Fr. Richard M. Majaw.
“Ngi kyntu ïa ki briew kiba don ha ka bor kiba la shim ïa ka jingsmai ban shakri bad ban ïada ïa ki nongshong shnong jong ka ri ba kin pynkut noh mardor ïa kum kine ki jingïashun jingisih ha ka jylla bad ha ka ri baroh kawei,” ong u kyrwoh.
“Ka Shillong All Faiths Forum ka ieng na ka bynta ka jingïalong kawei. Ngi ngeit ba ka nongrim ba la seng na ka bynta ka ri baieid jong ngi ka shong eh ha ka jingburom ïa ki jaidbynriew bapher bapher, ïa ki ktien, ïa ki kolshor bad ïa ki jingngeit. Ka Riti Synshar jong ka ri, ka Article 25-28 ka ai ha ngi ïa ka hok ban mane Blei laitluid,” la bynrap u kyrwoh.
“Ngi phah ïa ki jingduwai, sha kito kiba la shah ktah bad sha ki briew kiba long ka daw halor kane ka jingjia. Ngin nang ïai bteng ban duwai ïa ki nongïalam saiñhima sima jong ngi bad ïa baroh kito kiba don ha ka bor ban wanrah biang ïa ka jingsuk bad ka hok sha manla uwei pa uwei,” la pynkut u kywoh.
