Mawkyrwat, Lber 12: Hadien shi sngi jong ka jingdkut ka jingkieng ha wah Umshangkhar ha shnong Larem, South West Khasi Hills District kaba dei ka surok kaba pynïasnoh ïa ka Mawkyrwat bad ka Pariong shaduh ka surok bah National Highway, u MLA ka Mawkyrwat bah Renikton Lyngdoh Tongkhar mynta ka sngi jong ka 12 tarik u bnai Lber, 2024 u la hiar jurip ha ryngkat ka jingïadonlang ki ophisar na ka tnad PWD (Roads) ban peit ïa ka jinglong jingman jong katei ka jingkieng.
Hadien ka jingjurip, u bah Renikton Lyngdoh Tongkhar haba kren ha ki lad pathai khubor u la ong ba kane ka jingkieng ka lah ban dkut noh namar ba ka la rim palat kaba la kot sha ka 50 snem ei ei bad dei na kata ka daw ka sa dkut bad shuh shuh ka jingtrei ka dei ha ki por ba rim kim shem la mang katkum ka juk kaba mynta kaba la bun ki kali heh, kumta kane ka jingkieng ka la dkut noh.
“Ïa mynta shi por ngin peit shwa da kaba shna da ka surok Subway khnang ba ki paidbah nongleit nong-wan kin nym ïa kynduh bad ba kin ïoh ïaid biang na kane ka lynti kumba ki ju ïaid”, ong u bah Renik. La synrang da u bah B. Shylla, Assistant EE ka PWD (Roads) Mawkyrwat Division bad kiwei.
