Nongpoh, Ïaiong 18: U Deputy Secretary ka Ministry of Development of North Eastern Region jong ka sorkar India, u Nehjamang Simte bad u Timothy Dhar DDG, NIC, MDoNER mynta ka sngi kila leit ban jurip ïaka shnong Umkynsier kaba hap ha Jirang C&RD Block, Ri-Bhoi District ban ïakynduh kyrpang bad ki nongshong shnong ban tip ïaki jingeh bad ki jingdonkam jong ki.
Ha katei ka jingleit jurip jong kitei ki ophisar naka tnad DoNER la sakhi ruh da ka jingdonlang u Bah P Tynsong BDO ka Jirang C&RD Block, Bah PS Nianglang State Project Co-ordinator, ha kaba la ioh ruh ban kynduh kyrpang ïaki nongïalam shnong, ki SHG, Aganwadi, VEC bad kumjuh ki paidbah nongshong shnong.
U Nehjamang Simmte haba kren ha katei ka sngi u la ong ba ka jingthmu jong ki ban leit sha katei ka shnong ka dei namar ba ka sorkar India lyngba ka Ministry of DoNER kala pynlait ïa kawei ka Pilot Project ryngkat ka thong ban peit kyrpang ïa baroh ki jingdonkam naduh ka koit ka khiah, ka umbam ka umdih, ka pule puthi, ka bam kaba biang, ka iohkam iohjam bad kiwei kiwei.
Shuh shuh u la ong ruh ba lyngba katei ka prokram jong ka sorkar India, napdeng 10 tylli ki shnong jong ka jylla Meghalaya, 2 tylli ki shnong na Ri-Bhoi District kila shah jied ha katei ka thup ba kynthup ïaka shnong Umkynsier ba hap ha Jirang C&RD Block bad ka Pamlatar kaba hap ha Umsning C&RD Block.
U la ong ruh ba kitei ki 2 tylli ki shnong kila shah jied kyrpang namar ba kidei ki shnong kiba dang sahdien bha ba kin ioh ïaki kam pynroi kumba ioh lem kiwei ki shnong bad lyngba katei ka project kan ïarap ïaki shnong ba sahdien jong ka thaiñ Shatei Lam Mihngi ba kin ioh jingïarap naka sorkar India bad kumjuh ruh ka sorkar Jylla lyngba ki skhim bapher bapher bad hadien ka jingjurip naka liang jong u un sa phah ïaka kaiphod sha ka sorkar ba kan leh ïa kaba donkam.
Shuh shuh naka liang u Nehjamang Simte u la leit ruh ban iuhkjat haka shnong Pamlatar ha Ri-Bhoi ban wad jingtip ïaka jingeh bad jingjynjar jong ki paidbah katei ka shnong kumba katei ka shnong ruh ka hap ha katei ka thup.
