Nongpoh, Nailar 17: U Myntri Rangbah ka jylla mynta ka sngi hadien ka jingleit ban plie ïa u Mawnongrim ban siang rong ïa u surok Mawhati u la leit ban jurip ïa u surok na Liarbang sha Sabuda ba jngai kumba 10 km ka ban sa siang rong noh shen naka bynta ka jingbit jingbiang jong ki paidbah khamtam ba ka dei ka jaka khappud.
Ïa utei u surok la mang pisa kumba 18 klur lyngba ka skhim Meghalaya Integrated Transport Project (MITP) bala bei pisa daka World Bank.
Naka liang u Conrad Sangma u la pynpaw ba dei ka sorkar MDA kaba don ka jingkitkhlieh naka bynta ki paidbah bad tang hapoh 4 snem la lah ban wanrah shibun ki kam pynroi khamtam ki shnong bym pat ju don surok, hynrei la lah ban pynsuk ïaki paidbah nalor ka jingwan lyngshop ka khlam Covid-19 kumba 2 snem lynter.
U la ai nuksa ïa u surok Mawhati ba ki sorkar bala leit noh haki por ba mynshuwa kim lah ban pynurlong ïaka jingangnud ki paidbah, hynrei dei ha kane ka sorkar ba mynta kala shim ïaka sienjam ban siangrong ïa katei ka surok ba kongsan tam haka thaiñ Mawhati bad ka jylla baroh kawei bala shu shah ieh shrah mynta la bun snem.
