Shillong, Jymmang, 19: Ki nongkitkam shnong jong ka Dorbar Shnong Wahiingdoh bad ka Dorbar Shnong Lawmli ryngkat ka jingïadon lang jong u MDC ka Mawkhar-Pynthorumkhrah Constituency u Bah Pynshngaiñ N. Syiem bad u Executive Engineer jong ka Shillong Municipal Board (SMB) u Bah F.B Chyne ha ka sngi Palei la hiar jurip ïa ki bynta ba la twa jong ki rud jong ka Wah Umkhrah ha ki bynta ba dang hap hapoh u pud u sam jong ka shnong Wahiingdoh bad ka shnong Lawmali.
Ka jingleit jurip ïa ki rud jong kane ka wah ka long ba ha kine ki khyndiat sngi ka jingther jong u lapbah uba jur ka la buh jingma ïa ki rud jong kane ka Wah ha kaba ka kynroh kaba la ker ha shilynter jong kane ka wah ka la shong synjor.
Ha ka jingïakren bad ki lad pathai khubor, u Bah F.B Chyne u la ïathuh ba ka jingjurip ïa kane ka wah ka long ba don ki katto katne ki bynta jong ka kynroh ki la paw ba ki la synjor bad na ka liang jong ka Shillong Municipal Board (SBM) kan shimkhia ban ïada ïa ka jingtwa jong ka kynroh ba la ker ha shilynter jong kane ka wah.
U Rangbah Shnong jong ka Wahingdoh u Bah R. Marbaniang u la kyrpad ïa ki bor badei peit haba ki leh ïa kano kano ka kam ki dei ban da trei bha ym ban shu trei tangdep rukom haba shna ïa kino kino ki jingshna kum ki kynroh, ki surok bad kiwei kiwei de ki jingtei ki ban ym neh tang na ka bynta shisnem arsnem bad kiba buh jingma pat ïa ki paidbah.
