Shillong, Jymmang 19: U Symbud Myntri Rangbah ka Jylla Bah Prestone Tynsong hynne ka sngi palei, ula bthah ïa u Myntri Rangbah barim ka Jylla Dr Mukul Sangma ba un pyrkhat shuwa ïalade kumno ban jop ha ka elekshon MLA 2023 hashuwa ban batai lypa ïa ka lawei jong kiwei pat ki MLA ba mynta.
“Haba ïadei hi bad ka elekshon, ai ba un (Dr Mukul) pyrkhat ruh ïalade ba kumno un jop namar ka jingbym mon shuh ki paidbah ïa ki Nongmihkhmat la ka dei ki MLA ne MDC ka ju jia beit ha man ki jaka. Kane ka don beit bad ngi tih bha ruh hynrei ka shong pat kumno phi treikam hala ki jong ki Constituency” ong u Bah Prestone haba ïakren bad ki nongthoh khubor.
Kane kala mih hadien arsngi ba u Myntri Rangbah barim uba dei ruh u Nongïalam ka Liang Pyrshah Dr Mukul Sangma, ula kyntu ïa ka National Peoples Party (NPP) ba synshar ïa ka Jylla ba kam dei shuh ban pyrkhat ba baroh ki MLA kin dei kiba jop biang namar bun bha ki MLA kin sa shah pynliem ha ka elekshon MLA 2023.
U Bah Prestone ula ong ba ma u hi um dei satia u briew uba lah ban batai lypa ïa ka jingjop jingrem jong ki MLA ba mynta ne kiwei kiwei ki kyrteng haba bynrap “Ka shong ha ki paidbah ba kin vote. Ngam lah ban ong eiei la ki MLA ba mynta kin wanphai biang ne em”.
“Namar kata, ka elekshon hi ka dei ka elekshon bad ngam iahap ïa ka jingong u Dr Mukul namar ula shu batai lypa la kumba u tip ïa baroh kiei kiei” ong une u Nongïalam ka NPP haba pynkynmaw ïa une u Nongïalam ka Liang Pyrshah ba ha ka elekshon MLA 2018, ula kam ba un sa wanphai biang kum u Myntri Rangbah ka Jylla hynrei ula shah liem pynban.
Halor ka jingkam u Dr Mukul ba bun na ki MLA ka NPP kin nym ïakhun ïa ka elekshon ban wan na ka party, u Symbud Myntri Rangbah ula kyrpad ïa u Nongïalam ka Liang Pyrshah ban ai ïa ki kyrteng jong kum kine ki MLA ki bym ïakhun shuh ïa ka elekshon na ka NPP.
“Nga kyrpad ïa u ban sngewbha ai ha nga ïa ki kyrteng jong ki MLA ki ban nym don shuh bad ka NPP” ula ong.
U Dr Mukul haba kynthoh ïa ka jingkam jong u Myntri Rangbah ka Jylla Conrad Kongkal Sangma ba ong ba 7 ngut na ki MLA ka AITC kila pynpaw ïa ka jingkwah ban wan ïakhun noh ïa ka elekshon ban wan na ka ticket jong ka NPP, ula ong “Kam pher ïa kaei kaba ong da u Myntri Rangbah, hynrei kiba bun ki MLA ka NPP kin sa long ki kyrtong jong kiwei pat ki Political Party-Kane ka dei ka jingshisha namar nga tip bha ïa ka jingmut jingpyrkhat jong kiba bun ki MLA”.
Hynrei ula ong ba kum kine ki MLA ka NPP kin nym ïakhun satia na ka AITC hynrei kin leit na kiwei pat ki Party.
U Dr Mukul ula ong ba ka NPP ym tang ba ka bunkam ban khroh ïa ki MLA ba mynta jong ka AITC hynrei kala pyrshang ruh ban tan ïa ki MLA jong ki seng ba iatreilang ha ka Sorkar MDA. “Kila shu pynsyrwa kai ïa ka por da ka jingpyrshang ban tan ïa ki MLA jong ngi. Ki leh ïa kane namar ki sheptieng naba kim don satia ïa ki kyrtong kiba lah ban jop” ula ong.
