Nongpoh, Jymmang 15: Ka jingpynjulor bad jingtuh um jong ki paidbah ha shilynter u pipe um jong ka tnad PHE, kaba wan naduh ka tyllong ka wah Umran kaba don ha Nongthymmai Umsning, ka la nang jur ha kine ki sngi, kaba la wanrah ïa ka jingkyrduh um bun ki shnong ha ka thaiñ Nongpoh. Kane ka la ktah eh ïa ki paidbah, kynthup naduh ki ophis sorkar, ki skul, bad ki hospital.
Haba kren sha ki lad pathai khubor u Bah U Kurbah Executive Engineer ka tnad PHE u la ong ba ka jinglap jong ka tnad PHE ïa ki briew ba tuh um ka long ha shilynter naduh tyllong bad kane ka jingpong thliew bad tuh um ka dei kaba la kham slem bad kane ka la pynlong ïa ka um ban duh bor ban poi sha ka jaka ba dei ban poi, bad wanrah ka jingduna um ha sor Nongpoh bad ïoh ban sam sha ki paidbah tang khyndiat.
U Bah Kurbah u la ong ruh ba ka tnad PHE ka la lap ïa ka jingpong thliew ha shilynter u main line u ba pynpoi um sha Treatment Plant ha Iewmawlong Nongpoh bad dang ha kine ki khyndiat sngi ba la leit, ki nongtrei jong ka PHE ki la lah ban weng bun tylli ki pipe kiba la pyndonkam ban tuh um, da kaba prong bad pynïasoh tuh bad u pipe PHE.
Kum ka tnad PHE ka la kyrpad ïa ki paidbah ba kim dei ban pong thliew shuh nangne shakhmat namar kane ka wanrah jingeh kiba bun ïa ka tnad PHE ban maramot bad ban pynbiang ïa ka umbam umdih sha ki jaka ba dei ban poi, khamtam katei ka um kam pat dei kaba biang ban pyndonkam ban bam ban dih namar kam pat dei kaba la dep pynkhuid.
