Nongpoh, Nailar 06: Ki paidbah nongshong shnong ka Shnong Nongspung B ba hap ha Jirang Constituency ki la pynpaw ïa ka jingbitar kaba jur, kaba dei hadien ka jingshah ktah na ka jingshlei um hynnin ka Lah Sngi U Blei kaba la tap lut ïa ka surok bad ki ing ki sem na ka jingther u lapbah lapsan.
Kumba la pynpaw, ka daw kaba la pynlong ban don ka jingshlei um la kynnoh ba ka don ka jingtih khyndew da ki briew bar jylla ha katei ka Shnong bad na ka jingtuid ka khyndew sha ka surok ka la wan rah ka jingshlei um kaba la pynjot lut ïa ki jingthung jingtep bad wat ki ing ki sem.
Ki 5 tylli ki longing ki dei kiba la shah ktah jur ba kynthup ïaka ïing jong ka Kong Lijenta Sungoh, Kerning Sunoh, Premika Sungoh, Wompher Dhar bad ka ïing jong ka Kong Manar Suting.
Na ka liang kine ki longïing ba la shah ktah bad ruh ki paidabh nongshong shnong ki la pynrem jur halor kane ka jingshah hapoh katei ka shnong ba la wan ka jingshlei um kaba jur, kaba dei tang na ka daw ka jingtih khyndew beaiñ ha katei ka shnong.
Na ka liang kitei ki longïing ba la shah ktah bad ruh ki paidbah ki la dawa ïa ki bor ba dei peit ba kin tehlakam ïa kine ki kam tih khyndew beain bad ha kajuh ka por ruh ki la dawa na ka sorkar ba dei ban siew bai lutksan ïa ki jingthung jingtep bad ki ïing kiba la shah ktah ha kane ka jingshlei um.
