Nongpoh, Risaw 16: Ki paidbah jong ka thaiñ Umdap bad ki shnong bapher bapher ha katei ka thaiñ kila pynpaw ka jingsngewkhia kaba jur halor ka jinglong jingman jong u surok naduh 20 mer ter ter shaduh ka thaiñ Umdap namar ka jingsniew palat bad ka jingjot rathai jong u surok kaba la buh jingeh ïaki haka leit ka wan khamtam haka pang ka shitom.
Kumba long mynta ka jinglong jingman jong utei u surok kala pynsyrtok shisha ïaki paidbah ba leit ba wan namar ka jingsniew palat bala dap ruh sa tang da ki thliew ki syar ha shilynter jong utei u surok ba haduh mynta ym pat iohi kano kano ka dak ban pynbha lane siangrong ïa utei u surok
Katto katne ngut ki nongshong shnong kynthup ïa u Samla Albert Maring, uba dei u nongshong shnong ka Umdap Duma, kila pynpaw ruh ba kane ka jingsniew u surok kala pynjynjar bad pynsohsat ïaki paidbah nalor ka jingsniew, ki don ruh ki jaka ba long pung ktieh ba wat ki kali ki shem jingeh ban ïaid kumba utei u surok u dei u ba donkam bha ha katei ka thaiñ ba pynïasoh ruh bun tylli ki shnong bad kaba poi ruh sha ki shnong khappud ka Meghalaya bad Assam shaduh ki thaiñ Marmaiñ, hynrei la shu leh klet mynta la bun phew tylli ki snem khlem siang rong lane pynbha.
Halor katei ka jingeh ha kaba ïadei bad ka leit ka wan, naka liang u Samla Albert Maring ryngkat ki paidbah kila kyrpad ruh sha ka sorkar naduh ki nongmihkhmat ba kin phai khmat lem ha kaba ïadei bad katei ka jingeh kaba ki paidbah ki ïakynduh mawsiang ha ka leit ka wan da kaba pynmang skhim lane ban shna kino kino ki lad ki lynti ban pynbha ïa katei ka surok naka bynta ka jingbit jingbiang jong ki paidbah haka leit ka wan ha katei ka thain Umdap ha Ri Bhoi District.
