Nongpoh, Lber 27: Kan long ka sngi sah jingkynmaw ha ka khana pateng ban sa wan na bynta ki longïingkiba kyrduh kiba bun na ki shnong ha nongkyndong kim lah lait na kane ka jingduk jingkyrduh, hynrei U Trai Nongthaw U ju wan hiar ha ka dur jong kiwei pat ban kyrshan ïa kiba kum kita kiba mad ïa ki khep jong ka jingduk, kaba kane kam ju jia koit lait tang hangno re hangno, ha kaba ka sngi sah kynmaw ka la jia ha ka shnong Umshiaw kaba hap hapoh ka Mawhati constituency, Ri Bhoi district, kaba kawei na ki longïingkaba mad ïa ka jingduk ka la ioh jingkyrshan na u MLA jong ka Mawhati Constituency u Bah Charles Marngar.
Na ka liang u MLA u la synñiang shimet na ka tulop ba u la pynmang ban pynshna da ka ïingthymmai ha ka jaka ka ïingbarim ba la jot bad bym long shong shuh.
Ha ka program ba lyngkot, u Bah Charles kum u MLA bad u kongsan u la plie bad aiti ïa katei ka ïingsha ka Kong Emilda Nongrum bad u Bah Clement Lyngdoh ha ryngkat 4 ngut ki khun jong ki ha ka 26 tarik Lber, 2025, bad la sakhi lang da ka jingdon u Tbn B Shylla, bad u Rangbah Shnong, u Bah Com Lapang.
Haba kren lyngkot, u Tbn B Shylla uba la ieng na ka liang ka shnong, u la ong ba naduh ka snem 1972 ba la ioh jylla pura, lehse kane kan dei ka sien ba nyngkong ha ki khana pateng jong ka shnong ban ioh jingïarap na u MLA ban tei ïa ka ïingjong ki longïingbaduk, bad u la ong ruh ba dei tang kiba iohi jngai ki don ka jingsngew ïa ki jingioh pdiang ïa ki kam baphylla, la ha khyndew ne ha bneng ruh.
La ioh ruh ki jingkren lyngkot na u MLA, uba la pashat katto katne ki kyntien, hadien ba u la iohsngew ïa ka jingeh ba katei ka longïingka la mad, u la ong ba um lah ban shu hun tang ban iohsngew khlem da kyrshan ki lad jingïarap, ban tei pat da kaba thymmai kaba u la pynlut hi na ka shi bynta ka tulop jpng u.
Haba la aiti ïa katei ka ïingsha kitei ki shijur ki trai ryngkat bad ki khun jong ki, ka la don ka jingjaw ummat kmen ba khlem poi pyrkhat na ka kmie jong ka iing.
Nalor u MLA ki la don ruh na ki katto katne ki Nongshong Shnong kiba la noh synñiang ïa ki katto katne ki tiar Ïing, la shimkhia ban shna ïa kane ka Ïing da u Rangbah Shnong U Bah Kom Lapang lem bad ki Dkhot jong ka Dorbar Shnong
Lah ban kdew hangne, ba kane ka ïingha Umshiaw ka la long ka sien ba ar ba utei u MLA u la synñiang jingïarap, bad ka sien nyngkong ka dei ha ka shnong Liarbang jong ka Kong Sunita Marbaniang bad jong u Bah Phardingland Wahlang ha ryngkat bad ar ngut ki khun kiba dang rit bad kaba la aiti ha ka step jong ka 22 Tarik Kyllalyngkot 2025.
