Shillong, Nailar, 18: Uwei u rangbah uba la 38 snem ka rta, ïa uba la tip kyrteng kum u Bah Shanbor Surong, u khun jong u (L) Bah Teibor Lyngdoh Marshyllong u la jah rngai ha ka 17 tarik, Nailar, 2023 katba u dang mih iing ka Nia Kha na Patarim, Mawlai Nongkwar ha ka por 2:00 baje mynstep ban leit phai sha la ing sah ha Jaïaw Pdeng, Shillong.
Ha ka ejahar ba la ujor da ki bahaiing hasem sha ki Pulit jong ka Mawlai Police Station, ki la pyntip ruh ba ki la pyrshang ban telephone ïa u ha u nombar 7638944245 hynrei um shym la shim satia ïa ka phone.
“Ngi la pyrshang ban telephone ïa i Kha jong ngi, i la ïathuh ba i (Bah Shanbor) la mih na ing jong i ha ka por 2:00 baje mynstep,” la ïathuh ki bahaiing.
“Hynrei ha ka por 9:00 baje mynstep ngi la ïoh pdiang ïa ka phone call na ka mobile phone jong i (Bah Shanbor) hynrei la kren pynban da uwei u briew uba la ïoh khar ïa ka mobile phone na Mawlai Nongkwar Patarim. Ngi la leit shim noh ïa ka mobile phone na uba la ïohtam bad ngi la pyrshang ban wad ïa u hymmen jong ngi hynrei haduh kane ka khyllipmat ngim shym la lap satia ïa i,” la ong ïathuh shuh shuh ki bahaiing
La pyntip ruh ba u Bah Shanbor Surong u phong da ka sopti T-Shirt rong iong, ka patlun Jeans rong blue bad ka sandal. U don ïa ka jingjrong kaba saw phut shiteng eiei, ka sniehdoh kaba lieh bad ka dak sohkhliang na ka liang khmat ka mon.
Ki bahaïing hasem ki la kyrpad ruh ïa kino kino kiba ïohi ïa une u rangbah kin pyntip lyngba u Mobile Phone: 8219449850.
