Shillong, Nailar 18: Ka MCTA ka la rai ban shim klas ïa ki First Semester da ka Syllabus kaba rim bad kam nym bud satia ïa ka jingbthah ka NEHU ban hikai ne shim klas katkum ka NEP 2020.
Ka kyrwoh ba la phah da u General Secretary ka MCTA, u Dr. A. Rani, ka ong ba ka MCTA kan ïai bteng ïa ka jingbym ïatreilang bad ka NEHU ha kaba ïadei bad ka jingpyntreikam beaiñ ïa ka NEP 2020 bad ka dawa ruh ba ka NEHU kadei ban weng noh ïa ka Notification kaba la pynmih ha ka 12 tarik u Naitung 2023, ba la pynmih lyngba u OSD ka University.
Ka kyrwoh ka ong ruh ba ki samla pule ki la shim admission daka course kaba lai snem ne ka three under graduate programme kaba rim. “Ban bthah ïa ki samla pule ban pynkylla sha ka course kaba saw snem ka long kaba beaiñ bad ka bym shongnia eiei ruh em”, la ong ka MCTA.
Kane ka jingbthah ka NEHU ban pyntreikam ïa ka NEP kam long ruh kaba beit ba ryntih, namar ha ka Department of Music haduh mynta ym pat don kano kano ka course kaba thymmai katkum ka NEP. “Kumno kiwei ki department yn hikai da ki course ba thymmai katba kiwei par ki department yn hikai da ki course kiba rim”, la ong ka kyrwoh na ka synjuk ki Nonghikai College.
Ka Seng ka ong ba ka NEHU kadei ban ailad ïa barph kito kiba ïadon bynta bad ka jingpyntreikam ïa ka NEP 2020, kidei ban ïoh ka hok ban pynpaw ïa ka jingsngew jong ki.
