Nongstoiñ, Nailar, 18: Watla ka Shakambari Ferro Alloys Private Limited kaba don ha rud ka wah Rwiang, ka la ïoh pdiang ïa ka hukum na ka Ïingbishar ba ha khlieh duh jong ka jylla naduh u snem 2020, ba ka dei ban khang khyrdep noh hynrei ka dang ïai bteng ban pyntreikam haduh une u snem 2023.
Hadien ba Ïingbishar ba don burom ka Meghalaya High Court ka la ther tyngeh halor ka jingdon jong ki nongtih dewïong beaiñ, kiba pynpoi ïa u dewïong ha ki karkhana thang dewïong kiba la pynïeng beaiñ ha ka thaiñ Shahlang, katei ka karkhana ka la shah kynthup lang kum ka karkhana beaiñ ba ka Meghalaya High Court ka la pynngat lang ïa ka.
Ha kaba ïadei bad ka jingktah ïa ka jingkoit jingkhiah la ïoh ban ïakren bad ki rangbah bad ki longkmie ki bym kwah satia ban pynpaw kyrteng, ki la ong ba ka jingmih jong ka tdem na katei ka karkhana saiñ nar, ka ktah jur eh ïa ki khunlung kiba dang ar snem hapoh bad wat kiba la kham heh ruh haba thiah mynmiet ka jingdap shadem ka jur bha bad ki shitom haduh katta katta ban ring bad pynhiar mynsiem.
Kawei ka longkmie ka la ong ba haba sait ïa ki jaiñ kim ju thad shabar, namar ba lada thad habar tang hadien shiphew minit ki phngit pring kiba ïong ki la snoh rynjaiñ. Hynrei, baroh shikatta ym don ba sngap ne shahskhor ia ka jingeh ki paidbah, ka la ong.
