Shillong, Nailar, 18: Hadien ba ka Karbi Anglong Student Association (KSA) ka la kren sha ki lad pathai khubor ha ka sngi ba ki Regional Committee jong ka Sorkar Assam bad Meghalaya ki la leit ban ïa kynduh ha ki thaiñ khappud jong ki ar-tylli ki Jylla ki nongïalam ka KSA ki la byrthen ba kan long kum ha Manipur lada ki duh noh ïa ki jaka ki puta kiba ki kam ba ki dei ki jong ki.
“Na ka liang ka Seng ngi kwah ban pynpaw ba ki paradoh parasnam ki jong ngi kim dei ban duh ïa ki jaka ki puta kiba dei ka hok ka kynti ka jong ki, ngi kren shai ba shi inshi ngim kwah ki jong kiwei bad shi inshi ngim dei ban duh ïa ki jaka ki puta ki jong ngi,” ong u kyrwoh ba la phah da u Publicity Secretary ka KSU West Jaiñtia Hills Unit u Samla Juhhi Tariang.
“Ka sorkar Meghalaya ka dei ban shimkhia ïa ka jingbyrthen ka KSA halor ka kam ïa pynbeit pud namar ki ong ba kin pynkylla kumba jia ha Manipur. Ngi pdiang sngewbha bad ngi long kiba la kloi ban tyngkhuh bad ngim shym la bythen hynrei lada ki sdang hi ngim dei ki matlah bad ki kyllut,” la bynrap u kyrwoh.
“Na ka liang ka Seng kan ïai don barabor bad ki nongshong shnong kiba don ha ki thaiñ khappud bad lada jia ei ei kiba sdang kin hap ban shim ïa ka jingkitkhlieh,” la ong u Kyrwoh na ka KSU.
