Ha ka sien kaba nyngkong pynkoit ki Doktor NEIGRIHMS ïa ka jingpang tor ba kham phylla

Shillong, Nailar 18: Ki Doktor ha North Eastern Indira Gandhi Regional Institute of Health and Medical Sciences (NEIGRIHMS) ha ka sien kaba nyngkong eh ha ka jylla ne ha ka thaiñ shatei lamihngi, ki la leh ïa ka jingsumar kaba kham phylla na ka bynta uwei u khynnah samla uba shitom na ka jingpang ha ki tor.
Katkum ka kyrwoh ba la phah da ki bor pynaid ka NEIGRIHMS, la ong ba une u khynnah samla u la shitom ban ring bad pynhiar mynsiem mynta la kumba phra bnai. La ïathuh ba u la shah sumar ruh shabar jylla na kata ka case kaba ki ong ka Interstitial Lung Disease. Hynrei wat hadien kane ka jingleit sumar ruh kam shym la don kano kano ka jingïarap.
Hadien kane la pynkit ïa u sha NEIGRIHMS bad ha kane ka Hospital ka kynhun ki Doktor na ka Department of Tuberculosis and Respiratory Diseases, NEIGRIHMS hapoh ka jingïalam u Dr. Vijay Noel Nongpiur, Assistant Professor, u Dr John Muchahary, Senior Resident and Dr Gideon Thangkhiew, Junior Resident. Na kane ka jingwad bniah kine ki Doktor la lap ba une u khynnah samla u ngat ha ka jingpang kaba khampher ba la tip kum ka Pulmonary Alveolar Proteinosis kaba ktah ïa ka jingring bad pynhiar mynsiem jong u.
Kane ka jingpang Pulmonary Alveolar Proteinosis, ong ki Doktor, kadei kaba khamñiar ban ngat ki briew bad ka jia tang kumba 6.87 ngut na man ka shi million ngut ki briew.
La sumar ïa une u khynnah ha NEIGRIHMS, ha kaba la pyndonkam kumba 7 litar ka um mluh ban sait ïa uwei uwei u tor uba la sop da ka khleiñ. Hadien kane ka jingsumar une u khynnah u la sdang ban ïoh bor bad lah ka rukom ring mynsiem. Mynta une u khynnah u la ïoh lad ban leit phai ka sha ïing tangba u hap wan check up na ka por sha ka por.
ïa ka jingsumar ïa une u khynnah la ïarap ruh da ki Staff bad ki Doktor jong ka Departments of Tuberculosis and Respiratory Diseases, Anaesthesia and CTVS OT. Nangta ka Dr. Priyanka Dev, Associate Professor, ka Dr. Dasara Nongbet, Senior Resident bad ka Kynhun na ka Department of Anaesthesiology. Nangta u Dr. Reuben Kynta, Associate Professor, Department jong ka CTVS bad kiwei kiwei.
Ka khubor na NEIGRIHMS ka ong ba kane kadei ka jingjop kab akongsan ha ka jingsumar ïa ka jingpang Pulmonary Alveolar Proteinosis ha ka thaiñ shatei lammigngi hi baroh kawei. Lyngba jong kane ka jingjop ka rukom sumar ban long ka jingplie lad ïa kiwei kiwei de kiba lah ban ngat ha ka jingpang kaba eh kaba kum kane bad kumjuh ruh kiwei de ki jingpang kiba ktah ïa ka jingring bad pynhiar mynsiem.