Shillong, Nailur 19: Kan long ka kabu kaba bha tam ïa ki samla pule ha kane ka juk kaba mynta ba kin ïoh ka lad ban seng kam lajong bad ïa kane ka kabu ksiar na ka liang ki samla pule ka St Anthonys College ki la ïoh ka lad ba kin sngewthuh kham bha shuh shuh ïa ka jinghikai ba ki la ïoh na college bad ruh kum shibynta jong ka jingpyntreikam ïa ka National Education Policy kaba thymmai ka St. Anthony College Shillong na ka Department jong ka Bio Chemistry ka la wan hiar sha Eastern West Khasi Hills District ban leit jngoh da la ki jong ki khmat ïa ka rukom treikam haba pynmih ïa ka Um Rupa bad ban ïohsngew da la ki jong ki shkor kumno la seng ïa kane karkhana pynmih um kaba don ha ka shnong Kynshi Mawteijrong.
U nonghikai ka College u Dr. Herbert G Lyngdoh ula pynpaw ba ka karkhana kaba pynmih ïa ka Um Rupa kaba la ai kam ruh ïa kiba bun ki samla khlem kam khlem jam, ka dei ka karkhana pynmih um kaba la ïa ryngkat kyndan bad kiwei pat ki karkhna pynmih um ba don hapoh ka ri India. U la pynpaw ruh ïa ka jingsngewkhia ba ka sorkar watla ka pynshlur ban seng kam lajong hynrei kam shem la phaikhmat sha kane ka karkhana ban ai ïa ki jingïarap.
Ha kaba ïadei bad kane kawei ka na ki samla pule ka College ka la pynpaw ïa ka jingsngew ïahap jingmut bad u trai ka Um Rupa u Bah Wen Marweiñ, ba ki samla kiba don ïa ka sap ha ka kam business kim dei ban ïa beh than ïa ka kam sorkar hynrei kin phai khmat ruh ban sdang ban seng ïa ka kam lajong bad la kyntu ruh ïa ki paidbah ba kin pyndonkam ïa ka Um Rupa kaba la pynmih da u trai muluk trai ri kum ka jingïakyrshan lang bad ka la ïaroh ruh ïa ka jingsdang jong u Bah Wen ban pynmih bujli noh da u bilor ïit ha ka jaka u bilor plastik haba un sa pynmih ïa ka Um Rupa Premium ka ban sa mih noh shen namar kane kan ïarap ïa ka mariang na ka jingsniew.
