Shillong, Nailur 19: Kum shi bynta ban buddien haba ïadei bad ka jingthied ïa ki tin sopïing na ka liang ka Hynñiewtrep Youth Council (HYC) hynne ka sngi thohdieng ka la rai ban leit buh da ka jingujor sha ka Assembly’s public accounts committee (PAC) halor ka jingkynnoh ba ka don ka jingleh bym hok ha ka jingsam ïa ki Corrugated Aluminum Roofing Sheet da ka tnad Housing ka jylla kaba la jia ha kine ki sngi.
“Ngin sa leit ban jingujor sha ka PAC ha ka por kaba biang ban dawa tohkit ïa kane ka kam bad ban shim ïa ki lad ki lynti kiba donkam ban pynbeit,” ong u Bah Roy Kupar Synrem, President ka HYC.
Na ka liang u nongïalam ka HYC u la ong ba lyngba ka RTI la lap ba u Director ka tnad Housing, Meghalaya, Shillong vide Notice Inviting Quotation (NIQ) tarik Shillong, ka 11 tarik u Rymphang, 2022, u la khot quotation na ka bynta ban pynbiang ïa ka ‘Corrugated Aluminum Roofing Sheet ha ka AA3105H18 Alloy’ ba jrong 8 phut 800 MM ka jingheh bad jingrben ba 0.45 mm, na ka bynta ka dor Tender kaba long kumba T.20 klur.
Shuh shuh u la ong ba ka Departmental Tender Committee jong ka tnad Housing kaba la shong jingïalang ha ka 16 tarik u Lber, 2022, ka la pdiang ïa ki dor ba la buh da ka M/s Hariana Iron Works Pvt. Ltd @ T.17,989/- shi bundle kaba long ka dor kaba duna tam na kiwei pat ki nongbuh dor.
U la ong ruh ba hadien kane la pynmih ïa ka Supply Order ha ka 18 tarik u Lber, 2022 na ka bynta ban pynbiang ïa ki 11,118 bundle ki tin ïing ha ka dor kaba T.20,00,01,702 tang da u Director ka tnad Housing, Meghalaya, Shillong.
Shuh shuh ha ka 25 tarik u Lber, 2022, ka Departmental Tender Committee jong ka tnad Housing, halor ka jingtyrwa jong u Director ka tnad Housing, Shillong, ka la rai ban pynbun ïa ka jingthied ïa ki Aluminium roofing Sheets sha ka 25,790 tylli kata sa kumba 14672 bundle ka ban pynbiang da u juh u supplier bad ha ka 4 tarik Nailar, 2022, u Director ka tnad Housing, Shillong, ula pynmih ïa ka Supply Order sha ka M/s Hariana Iron Works Pvt. Ltd kaba kot haduh T.26,39,34,608.
“Bad khlem da khot ïa ki Tender thymmai bad nalor ka supply order bynrap sa 14,672 bundle ba la kdew haneng, u Director jong ka tnad Housing, Shillong, u la ai sha ka M/s Hariana Iron Works Pvt. Ltd ban pynpoi ïa ki mar kiba long ba ka jing Supply order dated Shillong, the 11th Nailar, 2022 – T 69,64,98,608/-, ka Supply order dated Shillong, the 2nd Kyllalyngkot, 2023 – T. 23,22,37,990/-, ka Supply order dated Shillong, the 5th Nailur, 2023 – T. 49,72,15,960/-, ka Supply order dated Shillong, the 6th Rymphang, 2024 – T.19,89,94,318,” ong u Bah Roy.
Na ka liang u Bah Roy Kupar u la pyntip ruh ba ka Departmental Tender Committee, ka tnad Housing, ryngkat bad u Director ka tnad Housing, Shillong ki la rai lang ban ai Supply order sha ka M/s Hariana Iron Works Pvt. Ltd ba kot T.188,88,81,484, khlem da khot ïa kino kino ki Tender ne quotation.
