Ïoh khusnam ki mar rep na jylla Meghalaya ha ka ïew pyni nam ha New Delhi
Mihkhmat ka Kong Jhanika Siangshai na East Jaiñtia Hills
Khliehriat, Naitung, 21: Ha ka ïew pyni nam ïa ki mar rep kiba na ki jylla bapher bapher ba la pynlong da ka NNS Media Group ha Pragati Maidam ha Delhi ba la pynlong naduh hynnin ka sngi ka 20 tarik u naitung bad yn pynkut lashai ka sngi ka 22 tarik, ha kane ka ïew pyni nam ki mar rep kiba na ka jylla Meghalaya ki la rung ha ka kyrdan kaba halor tam kum ki Best Quality Meghalaya Agricultural Products bad mynta ka sngi kiba mihkhmat na ka jylla ki la ioh khur ïa ka khusnam kaba kyrpang da ki syrnot.
Kiba la leit ban mihkhmat na ka tnat Horticulture Meghalaya ki kynthup ka CEO jong ka Farmers Producrs Organisation, ka kong Jhanika Siangshai kaba na shong Wapungskur, East Jaiñtia Hills District, ka District Horticulture na West Garo Hills District, ka Thera Marak, ADH MGSFAC, u S.Sangma, uba dei ruh u Chairman jong ka Farmers Producers Organisation MOVCD West Garo Hills lem bad kiwei kiwei ki nongrep.
Ha kane ka ïew pyni nam ki nongrep napoh ka jylla Meghalaya ki la rah bad pyni nam ïa ki jait khaw (khaw lieh, khaw saw, khaw ïong, khaw pnah) ba la pynmih napoh ka jylla, u sohtrun, u nei ïong, u shynrai Lakadong, u sohmarit, u jaïur, ki jait jam bapher bapher, ki banana chip kiba na ri lum Garo bad kiwei kiwei ki mar rep.
Na ka liang ka kong Jhanika Siangshai, ka la pynpaw ka jingsngew kmen halor ka jingioh pdiang jong ka ïa ka khusnam kaba da ka syrnot bad ong ruh ba na ka liang jong ka ruh ka la rah bun jait ki mar rep kynthup ki jait khaw bapher bapher ha kane ka ïew pyni nam bad ong ruh ba ki briew kiba wan sha kane ka ïew pyni nam ki la ai ki jingiaroh ïa ki mar rep kiba napoh ka jylla Meghalaya bad kiba bishar (judge) ki la wan ban aiti da ki syrnot, ka la ong ruh ba kane ka jingleit jong ka sha Delhi ka dei ka jingleit mihkhmat kaba na ka liang ki nongrep kaba lyngba ka tnat Horticulture jong ka jylla Meghalaya bad kane ka ïew pyni nam ka dei kaba heh bha kaba la don haduh kumba shi spah saw tylli ki stall kiba na ki jylla bapher bapher.