Nongpoh, Naiwieng 23: Ka long ka jingkyrkhu kaba khraw ïaka shnong Umsaw Khwan ha Ri-Bhoi district hadien ba mynta ka sngi la ioh ban plie paidbah syndon ïaka ïing Dorbar jong ka shnong kaba ki paidbah kila ap khmih lynti la slem naka bynta ban ioh pyndonkam noh ïaka.
Ïa katei ka ïing Dorbar la wan ban plie paidbah mynta ka sngi da u Dr. WR Kharlukhi MP ka Rajya Sabha kum u kongsan haka jingdonlang u Dr. C Lyngdoh MLA ka Umsning, ka kong Macdalyne S Mawlong MDC ka Umsning bad kiwei kiwei ki riew rangbah.
Ïa katei ka ïing Dorbar la tei lyngba ka skhim Chief Minister Special Development Fund (CMSDF) 2021-2022 bad Member of Parliament Local Area Development Scheme (MPLADS) 2022-2023 haka jinglut kumba T.28,00,000/-.
Haba kren ha katei ka sngi naka liang u Dr WR Kharlukhi u la ai ka jingïaroh ïaki bor pynïaid shnong halor ka jinglah jong ki ban pyndonkam hok ïaka skhim bala mang naka bynta ban tei ïa katei ka ïing Dorbar haduh ban da lah ban pyndep ïaka haka rukom kaba itynnad.
Kum u MP u la pynpaw ruh ka jingsngewkhia ha kawei ka bynta ban iohi ba ki dang don shibun ki shnong ki bym pat don ki ïing Dorbar kiba thikna ba ki paidbah ki lah ban shong Dorbar bad ban pyndep ïaki kam ki jam jong ki, bad ka dei ka por ïaki shnong bapher bapher ba kin ai ka jingïatreilang naka bynta ki jingdonkam haki shnong khamtam ban wanrah ki kam pynroi.
Naka liang u Dr C Lyngdoh kum u MLA haba kren ha katei ka sngi u la pynpaw ka jingsngewkmen kaba khraw ban iohi ba katei ka shnong kala kiew shaphrang haki kam pynroi bad lyngba ka jingioh ïa katei ka ïing Dorbar kaba thymmai kan long ka jingkyrkhu ïaki paidbah ha kaba u la kyrpad ïaki paidbah bad ki bor shnong ba kin pyndonkam hok bad sumar ïaka katkum ki jingdonkam jong ka shnong.
