Nongstoiñ, Naiwieng 25: U R.G.Momin MLA ka Rambrai Jyrngam konstitwensi mynta ka sngi, u la ïoh ban pyllait paidbah biang sa ïa kawei pat ka kali kit nongpang, na ka bynta ka thaiñ Rambrai ha ka jingïalang paidbah ba la pynlong ha ïew Rambrai.
La ong ba ïa katei ka kali kit nongpang la ai da u myntri rangbah ka jylla Meghalaya u Conrad K.Sangma lyngba ka Chief Minister’s Special Development Fund C.M.S.D.F 2023-2024.
Namar ka jingud jingnam palat ki paidbah jong ka thaiñ ka la pynlong ïa u R.G.Momin MLA ba un leit kyrpad ïa u myntri rangbah, ban pan Ambulance bad tang hadien shi taïew, u Conrad K.Sangma u la ai shi syndon haduh ar tylli ki kali kit Nongpang, kynthup ïa kawei na ka bynta ka Rambrai bad kawei pat na ka bynta ka thaiñ Ri Muliang ïa kaba la ïoh ban pyllait paidbah ha ïew Langpih myn ha ka 10 tarik u Naiwieng 2023.
U MLA haba aiti ïa u shabi kali ha u bah B.I. Nongsiej, u la pynkhamtilang ruh bad ka 10 hajar tyngka ka song pisa kum ka bai petrol na ka bynta katei ka kali.
Ïa katei ka jingïalang ba lyngkot la pynlong ha ïew Rambrai bad la ïadonlang ruh u bah Pynshlur Nonglyngkien president ka seng Independent, bah Lurshai Kharbani secretary ka Youth Wing bad kiwei kiwei ki riew rangbah jong ka thaiñ Rambrai.
