Nongstoiñ, Naiwieng 24: Ka Nongstoiñ Social Service Society (NSSS), kawei na ki seng trei mon sngewbha jong ka Meghalaya, ka la ïoh ïa ka Mahaveer Award ba la ai da ka Bhagwan Mahaveer Foundation, Chennai.
Ka NSSS ka la shah jied na ka thup ‘Community & Social Service’ napdeng ki spah tylli ki NGO jong ka Ri India. Kane Award ka kynthup ïa ka 10 lak tyngka ka pisa, ka Citation (syrnod) bad ka Memento (jingsah kynmaw).
Ka NSSS ka la ïoh jingtip ïa kane ka jingïoh khusnam naduh ka 26 tarik u Nohprah 2022 bad la pyllait khubor paitbah ha ka 12 tarik u Kyllalyngkot 2023. Hynrei ïa ka khusnam la sam ha ka 23 tarik u Naiwieng 2023 ha Chennai da u Lat ka Tamil Nadu R.N.Ravi Governor ha Raj Bhavan, Chennai ha ryngkat ka jingdon lang u Founder (Nongseng) bad ki Trustee jong ka Bhagwan Mahaveer Foundation.
Ïa kane ka khusnam ka NSSS la leit pdiang da u Fr. James Anderson Syiemlieh u ba dei Director barim ka NSSS bad u President ba thymmai jong ka NSSS, ha ka jingdonlang u Fr. Roland Lyngdoh u President barim jong ka NSSS, u Fr. Ditendar Lyngkhoi u Director Bathymmai jong ka NSSS bad u Fr. Seberin Lyngdoh u Treasurer jong ka NSSS.
Ha kane ka sngi la sam ruh ïa ki Award sa sha ki 3 tylli ki seng kiba kynthup ïa ka Dhyan Foundation, New Delhi (jong ka thup Non-violence & Vegetarianism), Friends of Tribals Society, West Bengal (jong ka thup Education) bad Jan Swasthya Sahyog, Chhattisgarh (jong ka thup Medicine).
Na ka liang jong ka NSSS, la ai khublei ïa baroh kito kiba la ïarap sbun ban ïoh ïa kane ka burom. Ka kyrpad ïa ka jingkyrkhu bad jingkitbok jong baroh ba kan nang ïai lah ban bteng ban ai ka jingshakri ïa kiba bun.
