Nongstoiñ, Nailar 10 : Ki paitbah nongshong shnong jong ka thaiñ Malangkona haduh mynta, ki dang klumar jingmut bha ha kaba ïadei bad u pud u sam wat la ka sorkar ka la pynbna ba ïa ki jaka kiba hap ha ka Hahim sector kiba kynthup naduh Upper Tarabari, Thanghula, Garojan, Balsrek, Huhapara, Salbari bad baroh shilynter haduh ban da ïakynduh bad ki jaka kiba hap ha ka Langpih sector.
Hadien ba ka sorkar ka la pynbna ba ïa ki jaka kiba hap ha katei ka thaiñ, la dep pynbeit bad la dep thung ruh ïa ki mawpud mawsam. Hynrei, u nongthoh khubor haba ïakynduh ïa ki paitbah nongshong shnong ban twad jingmut, ban kylli pyrthew la ki la don jingtip ne em ïa ki shnong ki thaw kiba hap ha Meghalaya. Nangta la ki la don jingtip ne em haduh katno tylli ki mawpud ka sorkar ka la dep thung ban pynthikna ba la dep ïa pynbeit, ka jubab ka long ba ka sorkar kam pat ai kano kano ka jingpyntip.
Ki riew rangbah na ki katto katne ki shnong kum ha Salbari, Gahonimara, Bakdrop, Aberam bad kiwei kiwei, ki la ong ba ki la ïohsngew ba ka sorkar ka la pynbna ba ka la dep ïapynbeit ïa ki jaka bad ka Assam. Hynrei haduh mynta kam pat ai kano kano ka jingpyntip da kita ki bor sorkar lane ba la wan jurip biang ha ryngkat ki jingthoh ban kdew ba u pud u sam bad ka jylla Assam u dei naduh kino ki jaka.
Tangba, ki la ong ruh ba naduh ba ka sorkar ka la pynbna ba la dep pynbeit, ki pulit Assam kim ju kham wan shuh ban tuklar sha kitei ki shnong ba ki shong ki sah kum ha ki por ba la leit. Kumta ka jingdon jong ka Meghalaya Police Out Post ha Salbari, lah ban ong ba ki pulit Assam ki la kham shynraiñ ban wan tuklar than.
Na ka liang ki riew tymmen kiba shong ba sah ha ka shnong Aberam, ki la ong ba katei ka jaka kaba ki shong ki sah kam dei ka khyndew shimet ne ka khyndew shnong, hynrei ka dei ka khyndew kaba la long trai da ki briew kiba shong shnong ha Langdongdai kiba dei ruh na ka jait Ñianglang.
Ki la ong ruh ba ki shong ha katei ka shnong la slem bah tangba ki shu shong wai, namar ba ki im da kaba rep kwai, tympew, kba bad kiwei kiwei ki mar rep. Kumta wat la ki la long ki trai shnong ha katei ka jaka hynrei ki hap ban siew pat da ka khajna sha ki trai khyndew man la u snem.
Nalorkata ki la ong ba watla ki dei tang ki nongshong wai ruh, naduh ka por ba ym pat ïoh ïa ka jylla ba pura kito kiba shong ha ki khyndew kur ki ha kaba ki hap ban siew khajna sha ki rangbah Kur, katba kito kiba shong ha ki jaka jong ka hima ki hap ban siew khajna sha u Sirdar jong ka hima Nonglang Sirdarship.
Ki la ong ruh ba lada ka sorkar ka la dep thung ïa kita ki mawpud mawsam, ka la dei ban pynshai sha ki paitbah haduh katno tylli ka la dep thung bad haduh hangno, khnang ba ki paitbah nongshong shnong kin sngew skhem bad sngew trai ba ka dei ka jaka ka jong ki.
